Ötən gün Azərbaycan Yazıçılar Birliyində (AYB) Xalq şairi Sabir Rüstəmxanlının "Şair və şər" kitabının təqdimat mərasimi keçirilib.
Tədbirdə Sabir Rüstəmxanlının həyat və yaradıcılığı, onun ədəbi və ictimai fəaliyyəti haqda ətraflı məlumat verilib. Qeyd edək ki, Sabir Rüstəmxanlı sözügedən romanı böyük millət şairi Məhəmməd Hadinin faciəli həyatına həsr edib. Roman-esse də adlandıra biləcəyimiz bu əsər xalq şairinin "Xətai yurdu", "Göy tanrı", "Ölüm zirvəsi", "Qorxu", "Difai fədailəri", "Sunami" romanlarından sonra yeddinci irihəcmli nəsr əsəridir.
Xalq yazıçısı Çingiz Abdullayev tədbiri açaraq Sabir Rüstəmxanlının həyat və yaradıcılığından, ictimai fəaliyyətindən söz açıb: "Mən xatırlayıram ki, 1980-ci illərin axırlarında Xalq Cəbhəsini birinci növbədə yazıçılar, alimlər yaratmışdı. Onların arasında Xudu Məmmədov, Yusif Səmədoğlu, İsmayıl Şıxlı, Bəxtiyar Vahabzadə və ələlxüsus da, Sabir Rüstəmxanlı var idi. Bunun üçün Sabir Rüstəmxanlını yalnız xalq şairi və yazıçı kimi təqdim etmək olmaz. O, həm də publisist, ictimai xadimdir".
AYB-nin sədri, Xalq yazıçısı Anar çıxış edərək kitab haqda düşüncələrini bölüşüb: "Nakam şairimiz Hadi haqda roman yazmaq dəyərli və tərifəlayiq bir işdir. Buna görə Sabir Rüstəmxanlıya təşəkkür edirəm".
"Azərbaycan" jurnalının baş redaktoru İntiqam Qasımzadə S.Rüstəmxanlının "Azərbaycan" jurnalındakı fəaliyyətindən danışıb: "Sabir Rüstəmxanlının yaradıcılığı çoxşaxəlidir. Mən onu döyüşkən yazıçı adlandırardım. Sabirlə 70-ci illərdə tanış olmuşuq. Həmin vaxt Ayaz Vəfalıyla "Ədəbiyyat" şöbəsində işləyirdi. "Azərbaycan" jurnalında sıx-sıx yazıları dərc olunurdu və mən deyərdim ki, Sabir "Azərbaycan" jurnalının ən fəal müəlliflərindən biridir".
Şair Vaqif Bəhmənli kitabla bağlı təəssüratlarını dilə gətirib: "Biz həmişə "Xeyir və Şər" kimi eşitmişik. Şair, əslində, elə xeyir deməkdir. Bu baxımdan "Şair və şər" xüsusilə maraqlıdır".
Yazıçı, ədəbiyyatşünas İslam Qəribli çıxış edərək Məhəmməd Hadi haqda roman yazılmasını əlamətdar ədəbi hadisə kimi səciyyələndirib və Sabir Rüstəmxanlının bu missiyanı uğurla yerinə yetirdiyini deyib: "Mən Hadi haqda tədqiqatlar aparmışam və bu mövzuyla bağlı üç monoqrafiya müəllifiyəm. Ancaq etiraf edim ki, bu kitabı oxuyarkən Məhəmməd Hadi və onun faciəli həyatı haqda hələ bilmədiyimiz çox məqamların olduğunu öyrəndim".
Professor Qəzənfər Paşayev, hüquqşünas Adil Minbaşı və başqaları çıxış edərək romanın ədəbi-bədii məziyyətlərindən söhbət açıblar.
Tədbirin sonunda müəllif çıxış edib, tədbirin təşkilatçılarına və qonaqlara minnətdarlığını bildirib.
Müşfiq ŞÜKÜRLÜ
çap et