"ABŞ Dövlət Departamentinin noyabrın 1-də Azərbaycanda keçirilən parlament seçkisiylə bağlı yaydığı açıqlama yumşaq desək, gülüş doğurur. Başında erməni yanlısı Con Kerrinin dayandığı Departament seçkinin nəticələrini şübhə altına qoyan heç bir arqument gətirə bilmədiyi üçün Azərbaycan hökuməti və xalqı ilə güclü, sabit, demokratik və firavan gələcək qurmaq istiqamətində işləməyə sadiq qaldıqlarını vurğulayıb, iradını da bildirib".
Bu sözləri millət vəkili Sahib Alıyev deyib. Onun sözlərinə görə, Dövlət Departamentinin ən böyük iradı da bununla bağlıdır ki, Azərbaycan ATƏT-in Demokratik Təsisatlar və İnsan Hüquqları Bürosunun seçkilərə lazımi sayda müşahidəçi göndərməsinə imkan verməyib. Amerika Birləşmiş Ştatları gərək bu haqda ümumiyyətlə danışmasın. Birinci ona görə ki, indiyə kimi bu ölkə həmin ATƏT-ə orada keçirilən seçkiləri izləməyə cəmisi 2 dəfə - 2008-ci və 2012-ci illərdə icazə verib". Deputat qeyd edib ki, 2008-ci ildə Amerikada keçirilən seçkini izləmək üçün oraya ATƏT-in 100 daimi mühahidəçisinin gəlməsi planlaşdırılsa da, maliyyə ixtisarları və bir sıra Avropa dövlətlərinin öz təmsilçilərini göndərmək istəməməsi və yaxud da nəzərdə tutulandan az göndərməsi nəticəsində onlar cəmi 47 nəfər olublar: "Yəni, Amerikada seçkinin gedişini cəmi 47 nəfər izləyib. Çünki ABŞ-ın 50 ştatından 46-da seçkiləri beynəlxalq müşahdəçilərin izləməsi qadağandır. Belədə həmin ştatlarda seçkinin gedişi izlənilsə belə bu, formal xarakter daşıyır. Amerika qanunlarına görə orada seçkinin gedişini müstəqil müşahidəçilər də izləyə bilməzlər. Onlar ancaq hansısa bir partiyanın üzvləri olmalıdırlar".
2012-ci ildə isə ATƏT-in ABŞ-da keçirilən seçkiləri izləmək üçün cəmi 44 müşahidəçi göndərdiyini xatırladan S.Alıyev bildirib ki, o zaman Texasın baş prokuroru Qreq Abbot beynəlxalq müşahidəçiləri seçki məntəqəsinin cəmisi 30 metrliyinə qədər yaxınlaşa biləcəklərini, ayaqlarını bundan bir santimetr qabağa atacaqları halda həbs olunacaqlarını bildirib.
Millət vəkili vurğulayıb ki, bu, ATƏT-in 1990-cı ildə təsdiqlədiyi Kopenhagen anlaşmasına ziddir: "Hər bir ATƏT üzvü kimi Birləşmiş Ştatlar da beynəlxalq müşahidəçilərin orada keçirilən seçkilərin gedişini izləməsinə izn verməlidir. Belə olan halda, ABŞ Dövlət Departamentinin ATƏT-in Demokratik Təsisatlar və İnsan Hüquqları Bürosunun Azərbaycanda keçirilən parlament seçkinin gedişini izləməməsini ən böyük nöqsan kimi qabartmasına haqqı çatırmı? Özü də bilə-bilə ki, biz bundan imtina etməmişik. Seçkini izləməkdən imtina edən elə həmin Amerikanın ATƏT-dəki səfiri Daniel Bayerin diktəsilə Demokratik Təsisatlar və İnsan Hüquqları Bürosu olub. Səbəb də budur ki, biz onların istədiyi kimi 400 deyil, nisbətən az müşahidəçinin gəlməsini istəmişik. Maraqlısı odur ki, görəsən niyə əhalisinin sayı Amerikadakından təqribən 40 dəfə az olan Azərbaycana 10 dəfə çox müşahidəçi göndərilməsi planlaşdırılırdı? Burada məqsəd doğrudanmı seçkinin necə keçdiyini izləmək idi? Qərbdəki bəlli strukturların Dağlıq Qarabağ məsələsində tutduqları yanaşma bu sualın ritorikliyini göstərir".
Millət vəkili söyləyib ki, ABŞ Dövlət Departamentinin iradlarından biri də bəzi müxalifət partiyalarının seçkidən kənarda qalmasıdır: "Onları kim kənarda saxlayıb? Müsavata kim deyib ki, seçkiyə 3-4 gün qalmış prosesdən imtina etsin? Həmin partiyaların seçkiyə qatılmamasının səbəbini amerikalılar yaxşı bilirlər. Səbəb onların elektoratlarının olmamasıdır. Azərbaycandakı seçki Amerikadakıları ona görə narazı salır ki, istədikləri olmur, yəni "əsas müxalifət partiyaları" adlandırdıqlarına bir zamanlar buradakı səfirlərinin tələb etdiyi kimi parlamentdə 25 yer verilmir. 25 yer verilsə, onda seçkilər tam Amerika standartlarına və marağına cavab vermiş olacaq. Soruşan yoxdur ki, bu, Azərbaycan xalqının milli maraqlarına cavab verirmi? Vermir. Əgər biz müstəqil ölkəyiksə, seçimi də bu xalq öz milli maraqlarına cavab verən şəkildə etməlidir, kiminsə diqtəsilə yox".
Ceyhun ABASOV