Dünən barəsində həbs qətimkan tədbiri seçilən Beynəlxalq Bankın sabiq rəhbəri, Bakının "İnter" klubunun sahibi Cahangir Hacıyev barəsində bəzi yeni məlumatlar bəlli olub.
525.az-ın “Qafqazinfo”ya istinadən yaydığı məlumata görə, C.Hacıyevə Baş Prokurorluq tərəfindən verilən ilkin ittihamda onun Beynəlxalq Bankdan 120 milyon manat pulu mənimsədiyi bildirilir. Bu məbləğ ilkin araşdırma zamanı aşkarlanan rəqəmdir, istintaqın gedişi zamanı mənimsəmə məbləğinin yüksələcəyi də istisna deyil.
Bundan başqa, sabiq bankir saxta yolla 10 nəfərə yaxın sıravi vətəndaşların adına külli-miqdarda kredit rəsmiləşdirərək özü götürüb.
C.Hacıyev hazırda Cinayət Məcəlləsinin 179.3.2 (külli-miqdarda mənimsəmə)və 308.2-ci (Vəzifə səlahiyyətlərindən sui-istifadə; ağır nəticələrə səbəb olduqda) maddələri ilə ittiham olunur. Qeyd edək ki, bunlar da ilkin ittihamlardır. İstintaqın gedişindən asılı olaraq ona əlavə maddələrlə də cinayət işinin açılacağı gözlənilir.
Xatırladaq ki, C. Hacıyev barəsində 4 aylıq həbs qətimkan tədbiri Baş Mütəşəkkil Cinayətkarlıqla Mübarizə İdarəsinin vəsatəti əsasında baş prokuror Zakir Qaralovun imzası ilə verilən sanksiya təqdimatı əsasında seçilib.
C.Hacıyevin hazırda Kürdəxanı təcridxanasında saxlandığı bildirilir.
çap et