525.Az

Zəlimxan Yaqub Kəpənəkçi kəndində anılıb


 

Zəlimxan Yaqub Kəpənəkçi kəndində anılıb<b style="color:red"></b>

Yanvarın 21-də Gürcüstanın Bolnisi rayonunun Kəpənəkçi kəndində müasir Azərbaycan ədəbiyyatının görkəmli nümayəndəsi, Azərbaycan Aşıqlar Birliyinin sədri, Xalq şairi Zəlimxan Yaqubun anım mərasimi keçirilib.

Tədbirdə Gürcüstanın dövlət, hökumət rəsmiləri, parlamentin deputatları, Azərbaycanın və Türkiyənin bu ölkədəki səfirliklərinin, SOCAR-ın əməkdaşları, ictimaiyyətin nümayəndələri iştirak ediblər.

Əvvəlcə Qurani-Kərimdən ayələr oxunub.

Gürcüstan parlamentinin deputatı Mahir Dərziyev çıxışında deyib ki, Zəlimxan Yaqub 1950-ci il yanvarın 21-də Kəpənəkçi kəndində anadan olub. Kəpənəkçidə, sazın-sözün içində böyüyüb. O, nə yazmışdısa saz üstə kökləmişdi. Yaxşı bilirdi ki, bu yolda Azərbaycanı tanıdan nəhənglər var, hər sözü dünya boyda olan kişilər var. Bu yolda var olmağın, özünü təsdiq etməyin böyük hünər olduğunu anlamamaq onun üçün mümkünsüz idi. Ona görə də könül verdiyi şeirin əlçatmaz zirvəsində özünü təsdiqləmək üçün çox yuxusuz gecələr keçirmişdi. Bu gün onun doğulduğu kənddə 66 yaşının və anım gününün keçirilməsi xalq şairinə olan sevginin nümunəsidir.

Azərbaycan Aşıqlar Birliyinin katibi Musa Nəbioğlu, Marneulidəki Azərbaycanlıların Mədəniyyət Mərkəzinin rəhbəri Fazil Həsənov, Gürcüstanın Barış və Vətəndaş Bərabərliyi üzrə Dövlət naziri Paata Zakareişvili, Kvemo Kartli bölgəsinin qubernatoru Paata Xizanişvili, ictimaiyyət nümayəndəsi Hidayət Hüseynov böyük söz ustası haqqında fikirlərini bölüşüblər.

Bildirilib ki, bədii yaradıcılığa gənc yaşlarından başlayan Zəlimxan Yaqub Azərbaycanın zəngin şeir ənənələrini uğurla davam etdirən şairlərdəndir. O, xalq yaradıcılığından məharətlə bəhrələnərək müasirlərimizin yüksək insani keyfiyyətlərini, ümumbəşəri və milli dəyərləri, tariximizin taleyüklü anlarını özündə əks etdirən əsərlər yaradıb.

Şairin rəngarəng mövzulu və dolğun məzmunlu şeirləri poeziyamızın inciləri səviyyəsinə qalxaraq Azərbaycan ədəbiyyatında yeni söz kimi qəbul edilib. Z.Yaqubun Azərbaycan ilə Gürcüstan arasında dostluq tellərinin möhkəmlənməsində, ədəbiyyatımızın, mədəniyyətimizin inkişafında müstəsna xidmətləri olub.

Xalq şairi Gürcüstanda da çox sevilən yaradıcı insan idi. İki dost və qardaş ölkə arasında mədəni əlaqələrin, mədəniyyətlərin inkişafındakı xidmətlərinə görə Azərbaycanın və Gürcüstanın yüksək dövlət mükafatlarına layiq görülüb.

Çıxışlar zamanı Kəpənəkçi kəndində Zəlimxan Yaqub adına Poeziya Evinin tikilməsi, xatirə muzeyinin yaradılması, Xalq şairinin əsərlərinin gürcü dilinə tərcümə olunaraq Gürcüstanın ali və orta məktəblərində paylanılması barədə təkliflər irəli sürülüb.

Gənc aşıq Məsim Rəcəbov böyük şair və ustada həsr etdiyi şeiri oxuyub.

Xalq şairinin ailəsi adından çıxış edən qardaşı Çingizxan Yaqubov göstərilən diqqət və qayğıya görə Azərbaycan və Gürcüstan prezidentlərinə minnətdarlıq edib.

 





23.01.2016    çap et  çap et