Azərbaycanın Efiopiyadakı səfiri Elman Abdullayev Efiopiyanın tanınmış radio-kanalı “AfroFM”in canlı efirində Xocalı Soyqırımı haqqında müsahibə verib.
Səfirlikdən 525.az-a verilən məlumata görə, Ermənistanın silahlı qüvvələri tərəfindən Xocalı şəhərinin dinc sakinlərinə qarşı xüsusi amansızlıq və qəddarlıqla cinayətlərin törədildiyini qeyd edən səfir artıq 20-dən çox xarici dövlətlərinin qanunverici orqanları tərəfindən Xocalı soyqırımının tanındığını vurğuladı.
E.Abdullayev cinayətkarların cəzasız qalmayacaqlarını və Heydər Əliyev Fondunun vitse-prezidenti Leyla Əliyevanın rəhbərliyi altında aparılan “Xocalıya Ədalət” beynəlxalq kampaniyasının dünya ictimaiyyətinin məlumatlandırılmasına və Xocalıda törədilmiş bu cinayətlərə hüquqi və siyasi qiymətin verilməsinə yönəldiyini bildirib.
Ermənistanın silahlı qüvvələri tərəfindən Xocalıda uşaqlara, qadınlara və yaşlılara qarşı törədilmiş vəhşiliklərdən dəhşətə gələn radio-aparıcısı bu cinayətlərə beynəlxalq ictimaiyyət tərəfindən ədalətli qiymətin verilməsinin davam edəcəyinə ümidvar olduğunu bildirib.
Səfir cinayətkar hərbi diktatura rejimi tərəfindən idarə olunan Ermənistanın beynəlxalq ictimaiyyətin mövqeyinə qarşı hörmətsizlik nümayiş etdirərək, Azərbaycanın 20% torpaqlarının hələ də işğal altında saxladığını, BMT Təhlükəsizlik Şurasının 4 Qətnaməsinin tələblərinin yerinə yetirmədiyini və 1 milyondan artıq qaçqın və məcburi köçkünümüzün öz tarixi torpaqlarına dönə bilmədiklərini vurğulayıb.
Səfir qeyd edib ki, dünya ictimaiyyəti bu ədalətsizliyə biganə qalmamalıdır.
Müsahibənin sonunda E.Abdullayev ölkəmizin tarixi, mədəniyyəti, tolerantlığı haqqında dinləyicilərə məlumat verib və Azərbaycanın mədəniyyətlərarası dialoqun aparılmasında xüsusi rolu barədə danışıb.
çap et