Oktyabrın 6-da, 95 yaşlı ADPU-da müsabiqədən keçərək müəllim kimi fəaliyyətə başlamağımın 50 ili tamam olur.
Həyatımın bəzi mühüm mərhələləri bu qocaman tədris müəssisəsi ilə möhkəm bağlıdır.
Gənc ikən kütləvi cəza qurbanına çevrilmiş atam, çoxnəvəli xanımım, uzun müddətdir ki, ön cəbhədə hərbi borcunu ödəyən oğlum buranı bitirib.
Pedaqoji Universitet himninin sözlərini, filologiya və coğrafiya fakültələrinin marşlarını mən yazmışam...
Doldurubsan köksümüzü
Tükənməyən sevgi ilə;
Yaşın artıb çoxalsa da,
Gəncləşirsən ildən-ilə.
Məzunların canlı çıraq-
Şəfəq yayır eldən-elə.
Qabaqdadır ən uğurlu
Xoş günümüz, xoş çağımız;
Alqış sənə, ey möhtəşəm
Ali təhsil ocağımız!
Qədim Odlar diyarının
Müəllimlər müəllimi!
Sanki çaysan-ədəbiyyat,
Kimya, tarix qolun kimi.
Riyaziyyat, coğrafiya...
Bütün fənlər həyat elmi.
Yaxın Şərqdən, Uzaq Qərbdən
Gəlir dostluq sorağımız:
Alqış sənə, ey möhtəşəm
Ali təhsil ocağımız!
Ustadların-ana yurdu
Sevənlərə dərs keçənlər,
Övladların - sənət-bilir
Ehramını düz-seçənlər,
Halal zəhmət, mədəniyyət
Bulağından su içənlər.
Milli adət-ənənəyə
Qaynaqlanıb növrağımız:
Alqış sənə, ey möhtəşəm
Ali təhsil ocağımız!
Tale, ömür yolumuza
Vətən eşqi işıq salır,
Yeni, cavan nəsillər də
Öz andına sadiq qalır;
Haqq, ədalət sınağından
Çıxa-çıxa zəfər çalır.
Müstəqildir dövlətimiz,
Müqəddəsdir torpağımız;
Alqış sənə, ey möhtəşəm
Ali təhsil ocağımız!
çap et