Ukrayna parlamentində Azərbaycanla Ukrayna arasında diplomatik əlaqələrin qurulmasının 25 illiyinə həsr olunmuş dəyirmi masa keçirilib.
Azərbaycanın Ukraynadakı səfirliyinin təşəbbüsü ilə keçirilən tədbirdə Azərbaycan və Ukrayna parlamentinin deputatları, dövlət və hökumət rəsmiləri, elm və mədəniyyət xadimləri, diaspor və media təmsilçiləri iştirak ediblər.
Səfirlikdən verilən məlumata görə, Azərbaycanla Ukrayna arasında bir çox sahələrlə yanaşı, diplomatik əlaqələrin 25 illik uğurlarından söz açan Azərbaycanın Ukraynadakı səfiri Azər Xudiyev ikitərəfli strateji münasibətlərin möhkəm əsaslar üzərində qurulmasında Heydər Əliyevin tarixi xidmətlərindən danışıb. Azərbaycan prezidenti İlham Əliyevin qarşılıqlı əlaqələrin daha da inkişaf etdirilməsinə xüsusi diqqət ayırdığını nəzərə çatdıran səfir, beynəlxalq arenada strateji müttəfiqlər kimi tanınan hər iki dövlətin eyni mövqedən çıxış edərək bir-birinə dəstək vermələrini müstəqillik tariximizin uğuru kimi dəyərləndirib.
Azərbaycanı bölgədə Ukraynanın ən etibarlı dostu və strateji müttəfiqi adlandıran Ukrayna-Azərbaycan parlamentlərarası dostluq qrupunun rəhbəri Maksim Kuryaçiy ölkələrimiz arasındakı iqtisadi, siyasi, elmi, mədəni, hərbi, texniki əməkdaşlığın inkişaf dinamikasından söz açıb. Bu günlərdə Ukrayna parlament nümayəndələrinin ölkəmizdə işgüzar səfərdə olduğunu diqqətə çatdıran deputat son illər Azərbaycanın böyük inkişaf yolu keçərək şərqi Avropanın ən aparıcı ölkələrindən birinə çevrilməsinin fərəhləndirici hal olduğunu bildirib. Müstəqillik illərində Azərbaycanın keçdiyi yolun heç də hamar olmadığını, 1990-92-ci illərdə xalqımızın 20 yanvar faciəsi və Xocalı soyqrımı ilə üzləşdiyini bildirən M. Kuryaçiy bu ağır günlərdə Ukraynanın daima Azərbaycanın yanında olduğunu diqqətə çatdırıb.
Müstəqillik illərində Azərbaycanla Ukraynanın işğalçılıq siyasətinə məruz qaldığını xatırlayan Milli Məclisin İdman və Gənclər Komitəsinin sədri Fuad Muradov 25 il bundan öncə ermənilərin Xocalı şəhərində törətdiyi soyqırım siyasətindən bəhs edib. Heydər Əliyev Fondunun vitse-prezidenti Leyla Əliyevanın "Xocalıya ədalət" kompaniyası çərçivəsində həyata keçirdiyi tədbirlər nəticəsində dünyanın bir sıra ölkələrinin parlamentlərinin Xocalı soyqırımını tanıdığını bildirən deputat qəddarlıq baxımdan 20-ci əsrin ən amansız qətliamı olan Xocalı faciəsinin Ukrayna parlamenti tərəfindən də soyqırım aktı kimi qəbul olunmasının vacibliyini bildirib.
Tədbirdə Ukrayna parlamentinin deputatı Oleq Medunitsa, Milli Məclisin deputatları Rasim Musabəyov, Şahin İsmayılov, Taras Şevçenko adına Kiyev Milli Universitetinin prorektoru Bek Pyotr, Birləşmiş Ukrayna Azərbaycanlıları Konqresinin sədri Rövşən Tağıyev və digər şəxslər çıxış edərək Azərbaycanla Ukrayna arasındakı tarixi dostluq əlaqələrindən söz açıb, ikitərəfli diplomatik münasibətlərin daha da inkişaf etdirilməsinin vacibliyini vurğulayıblar .
Ceyhun ABASOV
çap et