BMT İnkişaf Proqramı (BMTİP) tərəfindən Bakının Xəzər rayonunun Qala qəsəbəsindəki Eko-parkında 4 ədəd hibrid enerji sərfəli avtomobil SOCAR-a təhvil verilib.
"APA-Economics" xəbər verir ki, bu avtomobillər benzin enerjisini elektrik enerjisinə çevirmək və öz növbəsində mühərriki işə salmaq üçün nəzərdə tutulub. Avtomobillər SOCAR-ın ekoloji məsələlər üzrə vitse-prezidenti Rəfiqə Hüseynzadəyə təhvil verilib.
BMTİP rezident nümayəndəsinin müavini, Alessandro Frakassetti Azərbaycanda enerji səmərəli tədbirləri həyata keçirən layihələrin əhəmiyyətini vurğulayıb. O SOCAR-ın sərfəli enerji tədbirləri təcrübəsinin digər dövlət qurumları və özəl sektor tərəfindən də mənimsənilməsinə ümidini izhar edib.
Avtomobillər Qlobal Ekoloji Fond (GEF) tərəfindən maliyyələşən və BMTİP və SOCAR tərəfindən birgə həyata keçirilən layihə çərçivəsində alınıb. Bir müddət əvvəl seçilmiş 12 SOCAR sürücüsünə eko-sürücülük üzrə təlimlər keçirilib. Test nəticələri onu göstərir ki, təlimlər əsasında sürücülər tərəfindən yanacağın istehlakı 20%-dən 8%-dək azalıb.
Bu layihə çərçivəsində yanacaq istehlakı sektorunda karbon emissiyalarının azaldılması üzrə silsilə tədbirlərdən yalnız biridir. Digər fəaliyyətlərə mövcud sahilyanı neft və qaz yataqları ərazisində baca və havaya buraxılan qazların yığılması, enerji səmərəli binaların və kiçik külək turbinlərinin qurulması daxildir.
Mərasimdən sonra, iştirakçılar Əlaqələndirmə Komitəsi Görüşündə layihənin 2016-cı ildə əldə etdiyi nəticələri nəzərdən keçirib və 2017-ci il üçün layihə planlarını müzakirə ediblər. Tədbir SOCAR tərəfindən təşkil edilmiş ağac əkmə mərasimi ilə tamamlanıb.
SOCAR-ın vitse prezidenti R. Hüseynzadə layihəni SOCAR-ın iddialı “sıfır emissiyalı kampaniya”ya çevrilməsi planının bir hissəsi kimi vurğulayıb. R. Hüseynzadə bu strategiyanın Azərbaycan iqtisadiyyatı və inkişafına, eləcə də daha təmiz ətraf mühitin təmin edilməsinə xidmət göstərəcəyini bildirib.
“Azərbaycanın yanacaq istehlakı sektorunda karbon emissiyalarının azaldılmasını təmin edən Milli Fəaliyyət Planları” adlı layihənin məqsədi tikinti, nəqliyyat və qaz emalı kimi üç sahədə səmərəli enerji pilot tədbirləri həyata keçirməkdir. Layihə BMT Dayanıqlı İnkişaf Gündəliyi, Azərbaycanın Milli İnkişaf Strategiyası və SOCAR-ın “sıfır emissiya” strategiyasını dəstəkləyir.
çap et