525.Az

ADU-da Azərbaycan-Çin yay düşərgəsi


 

ADU-da Azərbaycan-Çin yay düşərgəsi<b style="color:red"></b>

Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunda Çinin müxtəlif bölgələrindən olan həmyaşıdları ilə ünsiyyətdə olmaq və Çin dili biliklərini yaxşılaşdırmaq istəyən yeniyetmələr üçün Azərbaycan-Çin linqvokulturoloji düşərgəsi fəaliyyət göstərir.
 
Düşərgə Çin dili və xəttatlığının öyrənilməsi, Çin mədəniyyəti, incəsənəti və adət-ənənələri ilə tanışlığa xidmət etməklə yanaşı, yeniyetmələrə müxtəlif tədbir və müsabiqələrdə özünü sınamaq, yeni dostlar qazanmaq imkanı da verir. Düşərgə iştirakçıları üçün məşğuliyyət Azərbaycanın tarixi və görməli yerlərinə ekskursiyaları, eləcə də mədəni-əyləncəli tədbirləri, musiqili özfəaliyyət çıxışlarını əhatə edir. Azərbaycan və Çin yeniyetmələri Çin rəssamlığı, kağız kəsmə sənəti, çay mərasimlərinin keçirilməsi üzrə dərslərdə fəal iştirak edir, ənənəvi Çin oyunu olan madzyan oyununda bir-biri ilə yarışırlar.

Dünən ADU-nun rektoru, əməkdar elm xadimi Kamal Abdulla düşərgə iştirakçıları ilə görüşüb. Görüş zamanı K.Abdulla yeniyetmələrə uğurlar arzulayıb və yeni çinli dostlarımızın öz həmyaşıdlarına qədim zamanlardan bəri Çin ilə Böyük İpək Yolu vasitəsilə sıx bağlı olan Azərbaycanın qədim tarixi və mədəniyyəti haqqında məlumat verəcəklərinə ümidlərini ifadə edib.

Görüş zamanı ADU-nun nəzdində Konfutsi İnstitutunun direktoru, professor Rafiq Abbasov Azərbaycanın Çin və Avropa arasındakı mühüm tranzit rolu və Transxəzər beynəlxalq nəqliyyat marşrutunun yaradılması haqqında danışıb, prezident İlham Əliyevin 2015-ci ildə Çinə rəsmi səfəri zamanı imzalanmış "Azərbaycan Respublikası hökuməti və Çin Xalq Respublikası hökuməti arasında "İpək Yolunun iqtisadi qurşağı"nın yaradılmasının birgə təşviqi üzrə qarşılıqlı anlaşma haqqında Memorandum"un əhəmiyyətini vurğulayıb.

Sonra düşərgə iştirakçılarına sertifikatlar və xatirə hədiyyələri təqdim edilib.

S.QARAYEVA

 





18.07.2017    çap et  çap et