Dünən Bakı Dövlət Universiteti (BDU) ilə Çexiyanın Karlova Universiteti arasında dostluq və əməkdaşlığın 45 illiyinə həsr olunmuş tədbir keçirilib.
Tədbirdə çıxış edən BDU-nun rektoru, akademik Abel Məhərrəmov 1972-ci ildə BDU ilə Karlova Universiteti arasında imzalanmış əməkdaşlıq haqqında müqavilənin hər iki ali təhsil müəssisəsi üçün səmərəli olduğunu deyib. Onun sözlərinə görə, ötən illər ərzində 500-dən çox müəllim və tələbə təcrübə mübadiləsində iştirak edib, elmi əlaqələrin möhkəmlənməsinə xidmət göstərib. Karlova Universitetindən gəlmiş 10 müəllim və tələbə ölkəmizin flora və faunasını öyrənmək üçün Gəncə, Qazax, Lənkəran və Naxçıvanda olub.
Çexiyanın Azərbaycandakı səfiri Vitezslav Pivonka Bakı Dövlət Universiteti ilə Karlova Universiteti arasındakı əlaqələri yüksək qiymətləndirib. Səfir çexiyalı tələbə və alimlərin BDU-nun Qubadakı tədris-təcrübə və istirahət mərkəzində maraqlı tədqiqatlar apardıqlarını, onlara yaradılan şəraitdən razı qaldıqlarını diqqətə çatdırıb.
Karlova Universitetinin professoru Daniel Frinta BDU ilə 30 illik əlaqəsindən danışıb.
Tədbir universitetlərarası əlaqələrin 45 illiyinə həsr olunmuş sərgiyə baxışla başa çatıb.
S.QARAYEVA
çap et