Oktyabrın 6-da Azərbaycanın bir qrup tanınmış yazarı Cocuq Mərcanlıya və Horadizə səfər ediblər.
Səfər “Azərbaycan Yazarlar Klubu” İctimai Birliyinin “Canımız Qarabağ, yazımız Qarabağ-2” layihəsi çərçivəsində, AR Prezidenti yanında Qeyri-Hökumət Təşkilatlarına Dövlət Dəstəyi Şurasının qrantı əsasında gerçəkləşdirilib.
Azərbaycan Yazıçılar Birliyinin (AYB) sədri, Xalq yazıçısı Anar, birinci katibi, Xalq şairi Fikrət Qoca, AYB Ağsaqqallar Şurasının sədri, Xalq şairi Nəriman Həsənzadə, AYB katibi, “525-ci qəzet”in baş redaktoru, yazıçı-publisist Rəşad Məcid, “Olaylar” qəzetinin baş redaktoru, yazıçı-publisist Yunus Oğuz, AYB Bədii Tərcümə və Ədəbi Əlaqələr Mərkəzinin sədri, şair-tərcüməçi Səlim Babullaoğlu, AYB sədrinin müşaviri Rauf Aslanov, AYB Hərbi vətənpərvərlik sektorunun rəhbəri, şair-bəstəkar Şahin Musaoğlu, AYB Qarabağ bölməsinin sədri, şair Ənvər Əhməd, şair Fəxrəddin Meydanlı və Azərbaycan Yazarlar Klubunun sədri, yazıçı-dramaturq, publisist Elçin Hüseynbəylinin iştirak etdiyi nümayəndə heyəti öncə Cocuq Mərcanlıda olublar.
Yolüstü aprel şəhidlərinin abidəsini ziyarət edən yazıçılar düşməndən tam azad edilmiş kənddə tikilmiş Şuşa məscidinin oxşarına baş çəkdikdən sonra məktəblilərlə görüşüblər.
Cəbrayıl İcra Hakimiyyətinin başçısı Kamal Həsənov kənddə aparılan quruculuq işlərindən danışıb.
Bildirib ki, kənd camaatı düşməndən çəkinmədən öz yurdlarında yaşayır, hətta Bakıdan köçüb gələnlər də var.
Görüş zamanı şairlər öz şeirlərini səsləndiriblər. Cocuq Mərcanlı kənd orta məktəbinin kitabaxanasına Qarabağ savaşı və onun qəhrəmanları ilə bağlı kitablar, disklər, bayraqlar hədiyyə edilib.
Daha sonra qonaqlar Horadiz şəhərinə yola düşüblər.
Heydər Əliyev Mərkəzində keçirilən görüşdə Füzuli rayon İcra Hakimiyyətinin başçısı Alı Alıyev çıxış edib və rayonda görülən işlərdən danışıb. Vurğulayıb ki, Qarabağın tam azadlığı üç amildən keçir: siyasi sabitlik, iqtisadi dirçəliş və hərbi qüdrət.
“Canımız Qarabağ yazımız Qarabağ-2” layihəsinin rəhbəri, yazıçı-dramaturq Elçin Hüseynbəyli səfərin məqsədi barədə məlumat verib. Bildirib ki, silahla qələm bir yerdə olarsa, xalqımız və ordumuz daha güclü olar və yazıçılar cəbhə bölgələrinə ardıcıl səfərlərilə bunu bir daha nümayiş etdirirlər.
Görüşdə çıxış edən Xalq yazıçısı Anar bir az öncə Cocuq Mərcanlıda olduqlarını bildirib və qeyd edib ki, Cocuq Mərcanlıya qayııdış tarixi hadisədir, ora qayıdıb yaşayanlar isə tarixi şəxsiyyətlərdir.
Yazıçı əlavə edib ki, Azərbaycan məkrli düşmənlə üz-üzədir və daim ayıq-sayıq olmalıdır. O, Cocuq Mərcanlıda və Horadizdə görülən abadlıq işlərindən fərəh hissi keçirdiklərini deyib.
Görüşdə N.Həsənzadə, Türkiyə səfirliyinin mədəniyyət müşaviri İrfan Çiftçi, Füzuli rayon ictimaiyyətinin nümayəndələri və başqaları çıxış edərək Azərbaycan torpaqlarının tezliklə işğaldan azad ediləcəyinə inandıqlarını bildiriblər.
Tədbirin sonunda yazarlar görüş iştirakçılarına Qarabağ döyüşçüləri və şəhidləri haqda kitabları və diskləri hədiyyə edib, eləcə də öz kitablarını bağışlayıblar.
Şahanə MÜŞFİQ
çap et