Dünən Bakı Yunus Əmrə İnstitutunun nümayəndə heyəti Azərbaycan Dövlət İqtisad Universitetində (UNEC) olub.
Nümayəndələrlə görüş zamanı çıxış edən UNEC-in rektoru, professor Ədalət Muradov Türkiyə ali təhsil müəssisələri ilə əlaqələrin UNEC üçün əhəmiyyətini bildirərək, əməkdaşlıq çərçivəsində imzalanan ikitərəfli razılaşmalar, ikili diplom proqramları, 50-yə yaxın universitetlə reallaşdırılan Mövlanə Proqramından söz açıb. Ə.Muradov bu əməkdaşlığın UNEC-də türk dilində tədrisin aparılmasına böyük imkanlar yaratdığını diqqətə çatdırıb.
Bakı Yunus Əmrə İnstitutunun müdiri İbrahim Yıldırım Cənubi Qafqazın ən böyük iqtisadyönümlü universiteti olan UNEC-in Türkiyə ali təhsil müəssisələri ilə əlaqələrinin ən üst səviyyədə qurulmasını yüksək qiymətləndirib.
Görüşdə UNEC-lə Bakı Yunus Əmrə İnstitutu arasında türk dilində tədrisin inkişaf etdirilməsinə dair protokol imzalanıb. Sənədə əsasən, UNEC-də türk dilinin tədrisində Avropa Dil Portfeli və beynəlxalq dil tədrisi standartlarına görə hazırladığı "Yunus Əmrə İnstitutu Modeli"nin tətbiqi nəzərdə tutulur. Eyni zamanda, UNEC-lə Bakı Yunus Əmrə İnstitutu türk dilinin tədrisi sahəsində ortaq elmi araşdırmaları davam etdirəcəklər.
S.QARAYEVA
çap et