"Azərbaycan Xalq Cümhuriyyəti - 100” mövzusunda elmi konfrans

Bakıda “Prezident sərəncamının işığında: Azərbaycan Xalq Cümhuriyyəti - 100” mövzusunda elmi konfrans keçirilib.

APA-nın məlumatına görə, elmi konfransın təşkilatçıları Azərbaycan Milli Elmlər Akademiyasının (AMEA) İctimai Elmlər Bölməsi və AMEA-nın Tarix İnstitutudur.

Konfransı AMEA-nın vitse-prezidenti, akademik İsa Həbibbəyli açaraq tədbirin əhəmiyyətindən danışıb, Tarix İnstitutunun bu istiqamətdə son illərdə gördüyü işlərə nəzər salıb. İ. Həbibbəyli dünyanın müxtəlif ölkələrinin arxivlərində olan sənədlərin yeni tədqiqatlar üçün ciddi material olduğunu xüsusi vurğulayıb.

Tarix İnstitutunun direktoru, akademik Yaqub Mahmudov Azərbaycanı bütün Şərq üçün nümunə göstərib. Y. Mahmudov Tarix İnstitutunun 2004-2005-ci illərdə iki cildlik “Azərbaycan Xalq Cümhuriyyəti Ensiklopediyası” çap etdirdiyini əlavə edib. Bu ensiklopediya Azərbaycan Xalq Cümhuriyyəti tarixinin bütün sahələrini əhatə edən ilk fundamental elmi soraq əsəridir.