Azərbaycanın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzinin (AMM) layihəsi ilə Daşkənddə "Azərbaycan musiqisinin inciləri" adlı diski buraxılıb.
Diskə Üzeyir Hacıbəylinin "Koroğlu" operasından uvertüra, "Aşıqsayağı", "Arşın mal alan" operettasından qızların xoru, Fikrət Əmirovun "Kürd ovşarı" simfonik muğamı, "Mən səni araram", Qara Qarayevin "İldırımlı yollarla", "Yeddi gözəl" əsərlərindən fraqmentlər, Müslüm Maqomayevin "Azərbaycan", "Sənsiz", Rəşid Behbudovun "Ay Laçın", "Nazəndə sevgilim yadıma düşdü", "Ana", Şövkət Ələkbərovanın "Azərbaycanım", "Axşam", Zeynəb Xanlarovanın "Kimə nə qaldı", "Cavanlığım", "Sən mənimsən Qarabağ" və digər musiqi əsərləri daxil edilib.
Alim Qasımovun "Əziz dostum", "Xatirələr", Akif İslamzadənin "Ala gözlüm", Flora Kərimovanın "Əzizim", "Darıxıram sənin üçün Şuşam", Azərinin "Çırpınırdı Qara dəniz", Elnarə Abdullayevanın "Azərbaycanım mənim", Mirələm Mirələmovun "Sənsiz" ifaları musiqi incilərimiz sırasına daxil edilərək diskdə yer alıb.
Məhdud sayda hazırlanan bu disklər Özbəkistan Dövlət Konservatoriyasına, musiqi, incəsənət məktəblərinə, yeni yaradılan Azərbaycan ocaqlarına, həmçinin musiqimizi sevənlərə hədiyyə ediləcək.
XƏDİCƏ
çap et