Dünən Azərbaycan Milli Elmlər Akademiyasının (AMEA) Tarix İnstitutu tanınmış ermənişünas alim İsrafil Məmmədovun 90 illik yubileyini keçirib.
Tarix İnstitutundan verilən məlumata görə, tədbirdə giriş sözü ilə çıxış edən AMEA-nın vitse-prezidenti, akademik İsa Həbibbəyli qeyd edib ki, İsrafil Məmmmədovun erməni faşizmini və onun himayədarlarını ifşa edən əsərləri çap olunub.
Tarix İnstitutunun direktoru, akademik Yaqub Mahmudov bildirib ki, İ.Məmmədov erməni vandallarının xalqımıza qarşı soyqırımları, deportasiya, erməni təcavüzkarlığı və Azərbaycan həqiqətləri ilə bağlı Moskva, Ankara, İstanbul və Bakıda keçirilən beynəlxalq konfranslarda məruzələrlə çıxışlar edib: "O, erməni vandallarının xalqımıza qarşı törətdikləri vəhşilikləri təkzibedilməz tarixi faktlar əsasında Azərbaycan, erməni, rus və ingilis dillərində dünya ictimaiyyətinə çatdırıb".
AMEA-nın İctimai elmlər bölməsinin akademik-katibi, akademik Nərgiz Axundova qeyd edib ki, ulu öndər Heydər Əliyevin "Azərbaycanlıların soyqırımı haqqında" fərmanına əsasən, Azərbaycan və Türkiyə respublikalarında 12 seriyalı "Sarı gəlin" sənədli filmi çəkilib və ekran işinin baş məsləhətçisi İsrafil Məmmədov olub: "Onun respublika radiosunda Azərbaycan dilində 1145, erməni dilində 2680 elmi-analitik məqaləsi səsləndirilib".
Bildirilib ki, tarixçi alim İ.Məmmədov Nizami Gəncəvi, İmadəddin Nəsimi, Mirzə Fətəli Axundov, Nəriman Nərimanov, Cəlil Məmmədquluzadə, Üzeyir Hacıbəyov, Səməd Vurğun, Rəsul Rza əzəmətini erməni və rus dillərində oxuculara çatdırıb.
Qeyd olunub ki, erməni millətçiləri 1967-ci ildə İsrafil Məmmədovun yaşadığı evi partladıblar.
Tarix İnstitutunun direktor müavini Cəbi Bəhramov çıxış edərək bildirib ki, İ.Məmmədov canlı bir akademiyadır: "Onun yazdığı əsərlər və elmi araşdırmalar biz tarixçilər üçün əsl mənbədir. İsrafil Məmmədov Tarix İnstitutunda fəaliyyətə başladıqdan sonra institutun nəşr etdirdiyi "İrəvan xanlığı: Rusiya işğalı və ermənilərin Şimali Azərbaycan torpaqlarına köçürülməsi" kitabının müəlliflərindən biri kimi 2012-ci ildə prezident İlham Əliyevin sərəncamı ilə dövlət mükafatına layiq görülüb".
Xatırladaq ki, İsrafil Məmmədov 1927-ci ildə Zəngəzur mahalının Mehri rayonunun Əmrəkar kəndində anadan olub.
Ceyhun ABASOV
çap et