Anna Netrebko və Yusif Eyvazov Moskva Filarmoniyasında konsert verəcəklər

Rusiyanın Xalq artisti Anna Netrebko (soprano) və Azərbaycanın Əməkdar artisti Yusif Eyvazov (tenor) fevralın 7-də Moskva Filarmoniyasının P.Çaykovski adına zalında konsert proqramı ilə çıxış edəcəklər.

AZƏRTAC Moskva Filarmoniyasının saytına istinadla xəbər verir ki, ifaçıları Rusiya Milli Filarmonik Orkestri müşayiət edəcək. Dirijor məşhur maestro Vladimir Spivakovdur.

Dünya operasının ulduzu A.Netrebko yaddaqalan obrazlar yaratmaqla yanaşı, konsert proqramları ilə də çıxış edir. Onun solo diskləri bestsellerə çevrilib. Musiqiçi haqqında çəkilmiş sənədli filmlər Avstriya, Danimarka, Almaniya, Rusiya və İsveçrədə nümayiş olunub.

Karyerasına İtaliyanın teatr və konsert zallarında başlayan Y.Eyvazov 2008-ci ildə Milanda Opera Müğənniləri Beynəlxalq Müsabiqəsinin Qran-Pri mükafatına layiq görülüb. O, 2012-ci ildə Bakıda Vokalçıların Bülbül adına VI Beynəlxalq müsabiqəsinin qalibi olub. Y.Eyvazovun adı “Dünyanın ən yaxşı tenorları” kitabına daxil edilib.