Bakı Xətai Sənət Mərkəzində növbəti rəsm müsabiqəsi elan edilib. "Qazaxım mənim" adlı rəsm müsabiqəsi Mədəniyyət və Turizm Nazirliyi, Qazax Rayon İcra Hakimiyyəti, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin birgə təşkilatçılığı ilə gerçəkləşib.
Bu barədə AZƏRTAC-a Xətai Sənət Mərkəzinin direktoru Zahid Əvəzov məlumat verib. Onun sözlərinə görə, rəsm müsabiqəsi Qazax rayonundan olan balaca və yeniyetmə fırça ustaları arasında keçirilir.
"Müsabiqə vətənpərvərlik və doğma yurda məhəbbət hissinin aşılanması, milli adət-ənənələrin təbliği, uşaq və yeniyetmələrin estetik və bədii zövqünün formalaşdırılması, obrazlı düşüncə tərzinin inkişaf etdirilməsi, onların yaradıcı qabiliyyətinin təkmilləşdirilməsi, habelə istedadlı uşaq və gənclərin üzə çıxarılması, bölgələrin turizm potensialının təbliği məqsədi daşıyır. Müsabiqəyə qatılmaq istəyənlər işlərini [email protected] elektron ünvanına aprelin 6-dək göndərə bilərlər. Müsabiqəyə 17 yaşına qədər uşaq və yeniyetmələr ən çox 3 əsər təqdim etməklə iştirak edə bilər. Ən çox uşaqların öz duyğu və düşüncələri ilə işlənmiş əsərləri seçiləcək", - deyə Z.Əvəzov söyləyib.
Əsərlər Xətai Sənət Mərkəzi və Qazax Dövlət Rəsm Qalereyasında sərgilənəcək.
çap et