Ankarada Mehmet Emin Özbey prezident seçkisinin ikinci turu üçün səsverməyə gələn sevgilisi Gizem Esinə cütlüyün fotoşəkili olan bülletenlə sürpriz evlilik təklifi edib.
525.az "Modern.az"a istinadən xəbər verir ki, Mehmet Emin Özbey prezident seçkilərinin ikinci turu üçün İncesu Şəhid Sadettin Dəmir Anadolu Liseyinə gələn sevgilisi Gizem Esinə sürpriz hazırlayıb.
Yanında nümunə seçki qutusu, cütlüyün fotoşəkilləri olan bülleten və "hə" möhürünü gətirən Özbey məktəbin qapısında diz çökərək, əlindəki üzüklə Esinə evlilik təklifi edib. Esinin "hə" cavabından sonra Özbey üzüyü sevgilisinin barmağına taxıb. Esin isə fotoşəkili olan seçki bülleteninə "hə" möhürünü sıxaraq zərfi seçki qutusuna atıb.
Səs verməyə gələn vətəndaşlar da cütlüyü təbrik edib, onlara xoşbəxtlik arzulayıblar.
Qeyd edək ki, bu gün Türkiyədə prezident seçkilərinin II turu keçirilir. Mayın 14-də keçirilən ilk turda Rəcəb Tayyib Ərdoğan 49,52 faiz, müxalifətin lideri Kemal Kılıçdaroğlu 44,88 faiz, ATA ittifaqının namizədi Sinan Oğan 5,17 faiz səs toplayıb. Səsvermədə seçicilərin 88,92 faizi iştirak edib.
Prezident seçkilərinin II turunda seçicilər “Cümhur İttifaqı”nın namizədi, hazırki prezident Rəcəb Tayyib Ərdoğan və “Millət İttifaqın”ın namizədi Kamal Kılıçdaroğlu arasında seçim edəcək. Səsvermə prosesi saat 08:00-da başlayıb, 17:00-da başa çatacaq.
çap et