14 saylı Xəzər-Pirallahı seçki dairəsindən deputatlığa namizədliyini vermiş Günay Əfəndiyeva Zirə Mədəniyyət Mərkəzində Zirə qəsəbəsinin seçiciləri ilə yenidən görüş keçirib.
525.az xəbər verir ki, görüş şəhidlərimizin xatirəsinin 1 dəqiqəlik sükutla yad edilməsi ilə başlayıb.
Zirə qəsəbəsindən olan Şəhidlərimizin Anaları - “Qaraheybət” aviasiya poliqonunda Dövlət Sərhəd Xidmətinə məxsus helikopterin qəzaya uğraması nəticəsində həlak olan polkovnik Füzuli Cavadovun anası Zemfira Cavadova, İkinci Qarabağ müharibəsində Şəhidlik zirvəsinə yüksələn Emin Qədirovun anası İradə Qədirova görüşdə iştirak ediblər.
Namizəd görüşlə bağlı sosial şəbəkədə bunları paylaşıb:
“Görüş zamanı da söylədiyim kimi, mən hər zaman onların yanındayam. Zəngin dünyagörüşünə malik olan Zirə Cümə məscidinin axundu Hacı Qədir Nəcəfzadəyə, uzun illər şagirdlərə dilimizi və ədəbiyyatımızı öyrədən müəllimə Tamilla Məmmədovaya dəyərli çıxışlarına görə təşəkkür edirəm.
Dəyərli insanlara - Azərbaycan Dillər Universitetinin professoru Sevinc Zeynalovaya, Azərbaycanın əməkdar artisti, Azərbaycan Dövlət Mədəniyyət və İncəsənət Universitetinin professoru Azad Şükürova, Bakı Bələdiyyə Teatrının direktoru Aynur Muxtarovaya, teatrın baş rejissoru, Azərbaycanın xalq artisti Mərahim Fərzəlibəyova və aktyoru Tural Əhmədə seçki kampaniyama dəstək verdikləri, mənimlə olduqları üçün səmimi minnətdarlığımı bildirirəm.
Fədakarlıq və ölümsüzlük abidəsinə çevrilmiş şəhidlərimizin xatirəsinin qəlblərdə daimi yaşadılması yönündə layihələrin həyata keçirilməsi seçki kampaniyamın prioritetləri sırasında mühüm yer tutur.
Müstəqil Azərbaycanın müdafiəsi uğrunda əbədiyyətə qovuşmuş qəhrəmanlarımızı hər zaman xatırlayaraq,
Gəlin, körpüləri birlikdə salaq!”
çap et