Elnur Eldaroğlu
Qalxacaq duman yerdən
Gözümü yuman yerdən
Yar məni incitsə də,
Küsmərəm uman yerdən.
Saçlarımı oxşama,
Heç vaxt mənə oxşama
Qoy nazını hey çəkim
Sübh-səhərdən axşama.
Qəmzələrin yorsa da,
Daş qəlbimi yarsa da,
Vaz keçə bilmirəm ki,
Məhəbbət kor olsa da.
Nə yaman yağır yağış,
Üzündə çəkir naxış,
Titrəsə qara bulud,
Şırhaşır edər qarğış.
***
Gecə saat üç olub,
bu yenə onlayndı,
Ulduzlar mənə deyir;
bu qız sənin tayındı.
Əsnədi duyğularım, barmaqlarım yayındı,
Ona yazacaqlarım, çıxdı yadımdan nəsə.
Qulaq asa bilmirəm
Nə gecə sükutuna,
Nə içimdəki səsə.
Səhər tez görüşəcəyik, niyə qalmışıq oyaq?
Yarımaçıq gözləri şirin-şirin, biz ovaq,
Yazdığımız mesaja nə qədər ürək qoyaq...
Bapbalaca ürəklər çıxırmış əsə-əsə
Sən demə ürəklərdə
Körpə ürək doğulur,
Bəyəndirir kiməsə!
Vaxt uçub, beşə qalır,
çox gecdir yatmaq üçün,
Özünü zülmə salıb sübhdən oyatmaq üçün.
Ruhunda nəşə qalır,
Dərd-səri atmaq üçün.
Qoxunun rəngin çəkir beynimdəki lamisə
Hormonlar öz rəqsində
Nələr baş verir bizdə
Necə dönür hadisə?
Görüşüb əhvallaşdıq
Ucundan-bucağından,
Hər şeydən danışmışıq
Uzaq yer qulağından.
Baxışlara güc düşür ağır göz qapağından
Sarılan xəyallarla niyə gedirik kəsə?
Gəl, dərin qucaqlaşaq
Vayfaydan uzaqlaşaq
Saf cücərən sevgini Xaliq bilir, xalq bilməsə.
***
Üzü qaralan dəniz,
Ağ buluddan inciyir.
Ölümü sonsuz görən
Ta mövluddan inciyir.
Dünyanı fəth edənlər,
Eh, süqutdan inciyir.
Həqiqət özü bəzən,
Bu sübutdan inciyir.
Dərd verən öz kefində,
Dərd ovudan inciyir.
Unudulan bir ömür,
Heç unudan inciyir?
Həddin aşan arzular,
Son hüduddan inciyir.
Cisminə sərhəd qoyan
Ruh, vücuddan inciyir.
çap et