2018-ci ilin "Azərbaycan Xalq Cümhuriyyəti İli" elan edilməsi ilə əlaqədar olaraq Azərbaycan Respublikasının Prezidenti yanında Bilik Fondu silsilə maarifləndirici tədbirlərini davam etdirir.
Dünən Xətai rayonu A.S.Xəlilov adına 263 nömrəli tam orta məktəbdə Azərbaycan Xalq Cümhuriyyətinin yaranmasının 100 illiyinə həsr olunmuş tədbir keçirilib. Tədbirdə müəllim və şagird kollektivi, məktəblilərin valideynləri iştirak ediblər.
Məktəbin direktoru Nurqələm Bayramova qonaqları salamlayaraq Cümhuriyyət tariximizin şərəfli səhifələrindən söz açıb, tədbir iştirakçılarını Azərbaycan Xalq Cümhuriyyətinin elan olunmasının 100 illiyi münasibəti ilə təbrik edib.
Məktəbin tarix müəllimi Dilbər Əsədova Azərbaycan xalqının zəngin dövlətçilik tarixindən danışıb, Xalq Cümhuriyyətinin mövcud olduğu qısa müddətdə xalqımızın mədəni inkişafına, elm, təhsil sahəsinin tərəqqisinə böyük töhfələr verdiyini vurğulayıb.
Bilik Fondunun sektor müdiri Xatirə Hüseynova 2018-ci ilin Azərbaycan Respublikasında "Azərbaycan Xalq Cümhuriyyəti İli" elan edilməsini dövlətçilik tariximizə sayqı kimi dəyərləndirərək təmsil etdiyi qurumun bu il çərçivəsində həyata keçirdiyi layihələr barədə məlumat verib.
Bilik Fondunun Lektorlar Qrupunun üzvü, Bakı Dövlət Universiteti Tarix fakültəsinin dosenti Boran Əzizin "Azərbaycan Xalq Cümhuriyyətinin tarixi" mövzusunda mühazirəsi dinlənilib. Natiq məktəblilərə cəmi 23 ay yaşamış Azərbaycan Xalq Cümhuriyyətinin xalqımızın dövlətçilik və ictimai-siyasi fikir tarixində rolundan bəhs edib. Mühazirəçinin sözlərinə görə, Cümhuriyyət tariximiz sübut edir ki, Azərbaycan xalqı hər zaman müstəqil yaşamağa, öz dövlətçilik ənənələrini bərpa etməyə qadirdir.
Mühazirəçi məktəbliləri maraqlandıran sualları cavablandırıb.
Xalq Cümhuriyyəti tarixinin daha dərindən öyrənilməsi məqsədilə məktəbdə keçirilmiş olimpiadanın qalibləri mükafatlandırılıb. Fərqlənən şagirdlərə Bilik Fondunun hədiyyələri də təqdim olunub.
Bayram tədbiri şagirdlərin hazırladıqları musiqili-bədii kompozisiya ilə yekunlaşıb.
Fondun təşkilatçılığı ilə növbəti tədbir Astara Pedoqoji Kollecində olub. Tədbiri Kollecinin direktoru Ağababa İbrahimov açaraq, rəhbərlik etdiyi təhsil ocağı ilə Fondun birgə əməkdaşlığı barədə ətraflı məlumat verib.
Fondun əməkdaşı Abbas Əliyev təmsil etdiyi qurumun Cümhuriyyət tariximizlə bağlı keçirdiyi silsilə tədbirlərdən söz açıb.
"Astara" qəzetinin baş redaktoru Fəridə Söhrabqızı çıxışında Cümhuriyyət liderlərinin müstəqillik yolundakı fədakarlıqları mövzusunda fikirlər səsləndirib.
Kollecin tələbəsi Səbinə Əlizadəyə Fondun təşkilatçılığı ilə "Cümhuriyyət tariximiz - qürurumuzdur" layihəsi çərçivəsində keçirilən "Azərbaycan Xalq Cümhuriyyəti haqqında bildiklərimiz" mövzusunda müsabiqənin qalibi olduğuna görə tədbirdə Diplom təqdim olunub.
İştirakçılara "ARB Aranfilm"in ərsəyə gətirdiyi "Gizli istiqlalçılar" sənədli filmi də göstərilib.
çap et