Dünən Azərbaycan Yazıçılar Birliyinin (AYB) "Natəvan" klubunda Xalq artisti, kinorejissor Oqtay Mirqasımovun 75 illik yubiley tədbiri keçirilib.
Tədbirdə AYB rəhbərliyi, tanınmış ziyalılar, mədəniyyət və ədəbiyyat xadimləri, media nümayəndələri iştirak ediblər.
Tədbiri giriş sözü ilə açan sədr müavini Nazim İbrahimov yubilyarın həyat və yaradıcılığından danışıb, onu Azərbaycan kino sənətinin peşəkar nümayəndəsi adlandırıb.
AYB-nin sədri, Xalq yazıçısı Anar Oqtay Mirqasımovun Azərbaycan incəsənət tarixində xüsusi rolundan söz açıb və bildirib o, ömrünün böyük hissəsini kinomuzun inkişafına və təbliğinə çalışmaqla keçirib. Sədr AYB-nin təbrik mükafatlarını yubilyara təqdim edib.
Rejissoru yubileyi münasibətilə təbrik edən Mədəniyyət nazirinin birinci müavini Vaqif Əliyev çıxışında qeyd edib ki, O.Mirqasımov böyük yaradıcılıq ömrünü boşuna yaşamayıb, 50-dən çox filmin müəllifidir. Bu filmlər istər yerli, istərsə də xarici tamaşaçılar tərəfindən hər zaman sevə-sevə izlənilir. O, məhsuldar və hərtərəfli fəaliyyəti, peşəkarlığı ilə hər zaman dövlətimizin diqqət mərkəzində olub. Bunun nəticəsidir ki, dövlət başçımız ən yüksək mükafatlarla onu mükafatlandırıb, Xalq artisti adına layiq görüb. Nazir müavini deyib ki, O.Mirqasımov nəinki rejissor kimi, həmçinin, yüksək idarəçilik qabiliyyətinə malik rəhbər, zəngin biliyə malik pedaqoq və Azərbaycanın ictimai-siyası xadimi kimi də hər zaman dövlətinə, xalqına sədaqət nümunəsi olub. Daha sonra V.Əliyev Mədəniyyət naziri Əbülfəs Qarayevin təbrik məktubunu yubilyara təqdim edib.
Xalq artisti, Kinematoqrafçılar İttifaqının ilk sədri Şəfiqə Məmmədova çıxışında qeyd edib ki, gələn il Oqtay Mirqasımovun yaradıcılığının 60 illik yubileyidir. Bu 60 ildə o, Azərbaycan kino sənətinə saysız-hesabsız töhfələr verib və bu töhfələrin nəticəsi kimi Kinematoqrafçılar İttifaqının Azərbaycan kinosunun 120 illik yubileyi münasibərilə hazırladığı Azərbaycan Milli Kino mükafatına layiq görülüb. Ş.Məmmədova deyib ki, O.Mirqasımov xalqına, torpağına, dövlətinə bütün qəlbiylə bağlı olan sənətkardır. Bu, özünü onun filmlərində də göstərir. O, həm də çox səmimi insandır.
Professor Fəqan Əliyev çıxışında O.Mirqasımovu keşməkeşli taleyə sahib yaradıcı adam kimi səciyyələndirib: "Yaradıcı adamların taleyi hər zaman çətin olub. Onlar hər zaman ağır yükləri öz çiyinlərində daşımalı olublar. Ona görə də onlar Allahın əziz insanlarıdır. Onlar yana-yana xalqı yaşadandırlar. Oqtay müəllim də həmin yaradıcı şəxslərdəndir. Bəşəriyyətin bu cür insanlara hər zaman ehtiyacı var".
Çıxışçılar O.Mirqasımovu zəngin yaradıcılıq yolundan söz açıb, yubileyi münasibətilə təbrik edib, yeni uğurlar diləyiblər.
Sonda çıxış edən yubilyar ona göstərilən diqqətə görə Mədəniyyət nazirliyinə, AYB rəhbərliyinə, çıxışçılara və tədbir iştirakçılarına öz təşəkkürünü bildirib.
Tədbirdə həmçinin, O.Mirqasımovun rus dilində işıq üzü görən yeni kitabı oxuculara təqdim edilib.
Şahanə MÜŞFİQ
çap et