Rusiyada keçirilən dünya çempionatında dünən ikinci tura yekun vurulub.
Qol.az-ın məlumatına görə, əvvəlcə G qrupunda İngiltərə və Panama yığmaları qarşılaşıb. Britaniyalılar 6:1 hesabı ilə qalib gələrək qrupun digər iştirakçısı Belçika kimi 1/8 finala vəsiqəni vaxtından əvvəl təmin ediblər.
Qeyd edək ki, Panama ilk dəfə qatıldığı dünya çempionatında ilk qolunu bu oyunda vurub.
Daha sonra H qrupunda Yaponiya və Seneqal milliləri üz-üzə gəlib. Görüş 2:2 hesabı ilə başa çatıb.
Günün son matçında Polşa Kolumbiyanı sınağa çəkib. İlk turda uduzan tərəflərin duelindən Kolumbiya qalib ayrılıb. 0:3 hesablı yenilgidən sonra Polşa növbəti mərhələ şansını itirib. Kolumbiya isə 1/8 finala adlamaq üçün son turda mütləq Seneqala qalib gəlməlidir.