"Pakistan-Azərbaycan əlaqələri, münasibətləri ən yüksək səviyyədədir. Bu münasibətlər, əlaqələr dünyaya nümunə ola bilər".
Bunu "525"ə açıqlamasında pakistanlı deputat, həmin ölkənin Parlamentlərarası İttifaqdakı (PAİ) nümayəndə heyətinin rəhbəri Sazip Durrani deyib.
S.Durrani eyni zamanda, Ermənistanın Azərbaycan torpaqlarını işğal etməsini və onu uzun illərdir işğal altında saxlamasını qəbul etmədiklərini vurğulayıb:
"Biz Pakistan dövləti, Pakistan xalqı olaraq Ermənistanın Azərbaycan torpaqlarını işğal etməsini pisləyirik. Bildiyiniz kimi də, məhz bu səbəbdən bizim bu günə qədər Ermənistanla heç bir siyasi-diplomatik əlaqələrimiz, münasibətlərimiz yoxdur. Bu münasibətlər yalınız Azərbaycan ərazilərinin işğaldan azad edilməsindən, Ermənistan qoşunları tərəfindən boşaldılmasından sonra yarana bilər. Biz münaqişə ilə bağlı BMT Təhlükəsizlik Şurasının qətnamələrindən çıxış edərək, Ermənistan qoşunlarının Azərbaycan torpaqlarını tərk etməsini və Azərbaycanın bir milyona yaxın qaçqın və məcburi köçkününün öz evlərinə dönməsini istəyirik".
S. Durranı ölkəsinin Ermənistan-Azərbaycan münaqişəsinin sülh və danışıqlar yolu ilə həllinə tərəfdar olduğunu da sözlərinə əlavə edib.
"Biz münaqişənin sülh və danışıqlar yolu ilə ədalətli həll edilməsinin tərəfdarıyıq. Ancaq istənilən halda biz Azərbaycanın yanındayıq və Azərbaycanın münaqişənin həlli yönündə atacağı bütün addımlarda hər zaman onu dəstəkləyəcəyik. Ermənistana da bir daha çağırış edirik ki, qısa bir müddətdə BMT və digər beynəlxalq təşkilatların qətnamələrinə, tələblərinə əməl, Azərbaycan torpaqlarını azad, tərk etsinlər, qaçqın və məcburi köçkünlər öz evlərinə dönsünlər. Bir sözlə, biz hər zaman Azərbaycanı dəstəkləmişik, dəstəkləyirik və dəstəkləyəcəyik" - deyə, o, sonda bildirib.
Kamil HƏMZƏOĞLU
çap et