Dekabrın 17-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Mətbuat Şurasının təşkilatçılığı ilə "Azərbaycanın media məkanında ədəbi dilin qorunmasına dəstək" layihəsi çərçivəsində "dəyirmi masa" keçirilib.
Tədbirdə iyun-noyabr ayları ərzində keçirilmiş monitorinqlə bağlı nəticələr də açıqlanıb.
"Azərtac" xəbər verir ki, Mətbuat Şurasının sədri Əflatun Amaşov monitorinqlə bağlı məlumat verib. O deyib ki, Şura 2011-ci ildən dilçi alimlər və peşəkar mütəxəssislərlə birgə mətbuatda monitorinqlər keçirir. Məqsəd mətbuatda Azərbaycan dilinin qorunması və dil normalarına düzgün əməl edilməsidir.
Mətbuat Şurasının monitorinq qrupunun rəhbəri İlham Abbasov qeyd edib ki, monitorinqə 15 qəzet, 10 informasiya saytı cəlb olunub. O bildirib ki, son dövrlərdə Azərbaycan mətbuatında dilin leksik normasının pozulması halları xeyli azalıb. Azərbaycan dilinin normalarına riayət olunması üçün zəruri tədbirlər görülür. Lakin leksik pozuntular azalsa da, qrammatik və üslub pozuntuları hələ də qalır.
Monitorinq qrupunun üzvü Bəhram Məmmədov deyib ki, səhvlərin böyük əksəriyyəti xarici KİV-lərdən tərcümə zamanı qeydə alınıb. Bundan başqa, bəzi jurnalistlər şifahi və yazılı dil arasında fərq qoymur.
Qrupun digər üzvləri isə bildiriblər ki, səhvlər mürəkkəb adların düzgün yazılmamasında, miqdar saylarının yerində işlənməməsində, süni sözlərdən istifadədə də özünü göstərir.
Şeyx Zahid Gilani Lənkəranda da anıldı
"Şeyx Zahid Gilani Səfəvilər sülaləsinin banisi Şeyx Səfiəddinin ustadı olub. "Şeyx Səfi təzkirəsi"ndə xüsusi maraq doğuran məsələlərdən biri məşhur Elxani hökmdarı Qazan xanın Şeyx Zahid Gilanini ziyarət etməsi və ona böyük ehtiram göstərməsi ilə bağlıdır. Bu fakt Şeyx Zahid Gilaninin o dövrdə böyük nüfuz və kəramət sahibi olduğunu göstərir".
Azərbaycan Milli Elmlər Akademiyasının (AMEA) Tarix İnstitutundan verilən məlumata görə, bunu institutun "Mənbəşünaslıq və tarixşünaslıq" şöbəsinin müdiri, professor Şahin Fazil "Doğumunun 800-cü ilində Şeyx Zahid Gilani" adlı beynəlxalq simpoziumda çıxışı zamanı deyib.
Simpoziumun təşkilatçıları AMEA-nın Tarix İnstitutu, Lənkəran Dövlət Universiteti, Türk Əməkdaşlıq və Koordinasiya Agentliyi (TİKA) və Türkiyənin Nəcməddin Ərbakan Universitetidir.
Lənkəran şəhərində keçirilən simpoziumda Lənkəran Dövlət Universitetinin rektoru vəzifəsini icra edən professor Natiq İbrahimov, Lənkəran Şəhər İcra Hakimiyyəti başçısının birinci müavini Möhübbət Babayev, Nəcməddin Ərbəkan Universitetinin professoru Əhməd Taşkın, Kastamonu Universitetinin professoru Cövdət Yaquboğlu, AMEA-nın Tarix İnstitutunun aparıcı elmi işçisi, dosent Dilavər Əzimli və başqaları çıxış ediblər.
Tədbirdə AMEA-dan Tarix İnstitutunun ortaəsrşünas alimlərinin, Lənkəran Regional Elmi Mərkəzin direktor müavini Mayis Cəfərovun və başqalarının məruzələri dinlənilib.
Simpoziumda bildirilib ki, müasir mərhələdə dünyanın ən güclü səfəvişünaslıq məktəbi məhz Azərbaycanda - Tarix İnstitutundadır.
Dilavər Əzimli qeyd edib ki, Şeyx Zahid Gilaninin yüz min müridi (şagird) olub.
Diqqətə çatdırılıb ki, Şeyx Zahid Gilani 1218-ci ildə Lənkəran rayonunun Siyəvar kəndində anadan olub. Rayonun Şıxəkəran kəndində yerləşən Şeyx Zahid türbəsi ölkəmizin tanınmış ziyarətgahlarından biridir. Türbə Nazirlər Kabinetinin qərarına əsasən, yerli əhəmiyyətli tarixi abidə kimi qeydiyyata alınaraq qorunur.
Beynəlxalq simpoziuma Azərbaycan alimləri ilə yanaşı, Türkiyə, Rusiya, İran və Bolqarıstandan olan tədqiqatçılar da məruzələrini təqdim ediblər.
Qeyd edək ki, Lənkərandakı simpoziumdan əvvəl AMEA-nın Tarix İnstitutunda Şeyx Zahid Gilaninin 800 illik yubileyinə həsr olunmuş elmi konfrans keçirilib.
CEYHUN
çap et