Bakı Dövlət Universitetində Ural Federal Universitetinin rektoru Viktor Kokşarovla görüş keçirilib.
Rektor Elçin Babayev Bakı Biznes Mərkəzində tərəflər arasında imzalanan anlaşma memorandumunun əhəmiyyətini qeyd edərək onun müəllim və tələbələrin gələcək inkişafında xüsusi rol oynayacağını bildirib.
BDU-nun təhsil, tədqiqat, innovasiya və elmi biliklərin kommersiyalaşdırılması, sosial həyat və beynəlxalq əlaqələrin daha da təkmilləşdirilməsi istiqamətində görülən işlərdən danışan rektor Elçin Babayev, eyni zamanda, onun 100 illik yubileyi haqqında məlumat verib.
Yubiley tədbirlərinin UNESCO-nun Parisdəki Baş qərargahında və Vyanada Azərbaycan Mədəniyyət Mərkəzində qeyd edildiyini diqqətə çatdıran rektor ölkədə və xaricdə çoxsaylı elmi, mədəni, kütləvi tədbirlərin keçirilməsinin nəzərdə tutulduğunu qeyd edərək qonaqları noyabr ayında keçiriləcək 100 illik yubileyə dəvət edib.
Təbiət, humanitar elmlər və iqtisadiyyat sahəsi üzrə 35 mindən çox tələbəsi olan Ural Federal Universiteti haqqında məlumat verən rektor Viktor Kokşarov onun müasir ali təhsil ocağı kimi beynəlxalq əlaqələrdə çoxşaxəli sferalara malik olduğunu bildirib. Rektor Bakı Dövlət Universiteti ilə imzalanan memorandumun əməkdaşlığın inkişafına verəcəyi faydalardan danışıb.
Görüşdə "ikili diplom", beynəlxalq reytinq təşkilatları ilə əməkdaşlıq məsələləri də müzakirə edilib.
S.QARAYEVA
çap et