Azərbaycan İlahiyyat İnstitutunun (Aİİ) rəhbərliyi yanında İctimai Nəzarət Şurasının üzvləri və KİV nümayəndələri payız semestri imtahan sessiyasının gedişatını izləyiblər.
İmtahan keçirilən auditoriyalarda olub, ayrı-ayrı fənlər üzrə yay imtahan sessiyasını müşahidə ediblər. Şura üzvləri və KİV təmsilçiləri tələbələrin sessiyaya hazırlıqlar, sualların tərtibatı, imtahan prosesi barədə müəyyən söhbətlər aparıblar.
Şura üzvlərinə və KİV təmsilçilərinə imtahan prosesi barədə ətraflı məlumat verilib, media nümayəndələrini maraqlandıran sualları cavablandırılıb. Bildirilib ki, 2019-2020-ci tədris ilinin yaz semestri imtahanlarının müvafiq təlimatlara və əsasnamələrə uyğun keçirilməsini təmin etmək məqsədilə yarana biləcək mənfi halları dərhal araşdırmaq və müvafiq tədbirlər görmək, habelə sessiyanın şəffaf, normativ sənədlərə uyğun təşkili üçün Operativ Qərargah yaradılıb. Eyni zamanda, imtahanların bir qayda olaraq yazılı, zərurət yarandığı hallarda şifahi formada keçirildiyi barədə Nəzarət Şurasının üzvləri, KİV təmsilçiləri məlumatlandırılıb. İmtahan sessiyasının mövcud qaydalara uyğun təşkili məqsədilə İnstitut rəhbərliyi tərəfindən xüsusi komissiyanın yaradıldığı, imtahanlara nəzarətin müəllim-koordinatorlar tərəfindən həyata keçirildiyi qeyd edilib. İmtahanlar arasında 2 gündən az olmayan müddətin təyin edildiyi, ona ayrılan vaxtın 2 saat müəyyənləşdirildiyi barədə məlumat verilib.
Məlumat üçün bildiririk ki, sessiya boyunca tələbələrin biliyinin qiymətləndirilməsində obyektivliyin təmini, şəffaflığın qorunması məqsədilə ictimaiyyət nümayəndələrinin müşahidəçi qismində iştirakı üçün lazımi şərait yaradılıb. İmtahan otaqlarının qarşısında müraciət və təklif qutuları asılıb.
İctimai Nəzarət Şurasının əsas məqsədi Aİİ-nin fəaliyyətinə ictimai nəzarətin həyata keçirilməsi; universitet ilə ictimaiyyət arasında səmərəli qarşılıqlı əlaqələrin təşkili; aşkarlığın və şəffaflığın təmin olunması; əməkdaşların və təhsil alanların hüquqlarının müdafiəsi və fəaliyyətinin təkmilləşdirilməsi üçün təkliflərin verilməsindən ibarətdir.
Şuranın tərkibinə Konstitusiya Araşdırmaları Fondunun rəhbəri, İnsan Haqları Birgə Qrupun üzvü Əliməmməd Nuriyev, təhsil üzrə ekspert, professor Şahlar Əsgərov, təhsil üzrə ekspert Nadir İsrafilov, "Trend" İnformasiya Agentliyi Baş direktorunun korporativ inkişaf üzrə müavini Arzu Nağıyev, "İki sahil" qəzetinin Baş redaktoru Vüqar Rəhimzadə, İctimai Televiziya və Radio Yayımları Şirkətinin İctimai-Siyasi Proqramlar Departamentinin direktoru Anar Yusifoğlu, Modern.az saytının rəhbəri Elşad Eyvazlı, "525-ci qəzet"in müxbiri Sevinc Qarayeva daxildir.
KİV nümayəndələri institutun kitabxanası ilə də tanış olublar. Onlara məlumat verilib ki, əvvəl kitabxananın bazasında 12 min kitab olub. Bu kitablar əsasən İslamla bağlı dini kitablar idi. Son zamanlar Azərbaycan Milli Elmlər Akademiyasının Mərkəzi Elmi Kitabxanası, M.F.Axundzadə adına Azərbaycan Milli Kitabxanası və digər qrumlarla əməkdaşlıq sayəsində artıq kitabxana təkcə dini ədəbiyyatla deyil, həm də müxtəlif dillərdə bədii ədəbiyyat nümunələri ilə zənginləşib.
Aİİ rəhbərliyi yanında İctimai Nəzarət Şurasının üzvləri isə bildiriblər ki, Azərbaycan İlahiyyat İnstitutu öz dəst-xətti olan bir institutdur. İnstitutda, sadəcə, din xadimləri deyil, həmçinin, pedaqoqlar da hazırlanır. Keyfiyyətli təhsil vermək, tarixinə, mədəniyyətinə, dilinə bağlı insan yetişdirmək, zəngin dünyagörüşü olan din xadimləri hazırlamaq institutun əsas hədəflərindəndir.
KİV təmsilçiləri imtahan prosesinin təşkili və gedişindən razılıqlarını ifadə ediblər. Bildirilib ki, imtahan olunub, sessiya normativ sənədlərə uyğun və qərəzsiz keçirilir.
S.QARAYEVA
çap et