BMT-nin İnkişaf Proqramı (UNDP) Urmiya gölündəki ekoloji fəlakətin aradan qaldırılması üçün İrana 135 milyon dollar vəsait ayırıb.
APA-nın “Mehr” xəbər agentliyinə istinadən məlumatına görə, bu barədə İranın vitse-prezidenti, ölkənin Ətraf Mühitin Mühafizəsi Təşkilatının rəhbəri Məhəmmədcavad Məhəmmədizadə bildirib. Onun sözlərinə görə, gölə tökülən çayların sularından düzgün istifadə etməmək və qeyri-qanuni şəkildə yararlanmaq Urmiya gölünün qurumasına gətirib çıxarır.
Qeyd edək ki, Urmiya gölü İranın Şərqi və Qərbi Azərbaycan vilayətlərinin ortasında yerləşir. Sahəsi təxminən 6 min kvadrat kilometr olan Urmiya gölünün 70 faizi tamamilə quruyub. Hazırda Urmiya gölündə hər 1 litr suda 400 qram duz mövcuddur. İran hökuməti 2011-ci ilin sentyabrında Urmiya gölündə ekoloji fəlakətin aradan qaldırılmasına 900 milyon dollar vəsait ayırmışdı.
çap et