M.Ə.Rəsulzadə bir lider olaraq xalqın düşdüyü ağır vəziyyətdən çıxmaq bacarığını məhz bu qəzetdə nəşr olunan yazılarında ortaya qoyub.
Qəzetin ilk sayının baş məqaləsi "Tutacağımız yol" adlanır. Müəllifi M.Ə.Rəsulzadə
olan yazı bu sonluqla bitir: "Tutacağımız yolda önümüzə çıxacaq olanlara qarşı yeganə vasitəmiz olacaq açıq söz!". Bu mənada, "Açıq söz" türkçülük, milli özünüdərk, dövlətçilik ideyalarını təbliğ edib. Qəzet fəaliyyətini erkən dayandırsa da xalqa təbliğ etdiyi fikirlərlə Azərbaycanda milli dirçəliş hərəkatının yeni dalğasının başlaması üçün əvəzsiz rol oynayıb.
Nəticədə, 1917-ci il aprelin 15-dən 20-dək Bakıda keçirilən Qafqaz Müsəlmanlarının Qurultayında M.Ə.Rəsulzadə tərəfindən irəli sürülən ərazi muxtariyyəti və millətlərin istiqlalı ideyasının məntiqi sonluğu 1918-ci ilin mayın 27-də Azərbaycan Milli Şurasının yaradılması, mayın 28-də isə Azərbaycan istiqlalının bütün dünyaya elan edilməsi olur.
M.Ə.Rəsulzadə 28 may istiqlalını mühüm hadisə adlandıraraq yazıb: "O tarixdən əvvəl bir millət olaraq varlığını isbat edən Azərbaycan xalqı bu tarixdən etibarən milli olaraq dövlət qurmuş və bu dövlətin istiqlalı uğrunda bütün mövcudiyyəti ilə meydana atılıb". Bu mübarizədə isə siyasi, ictimai və ədəbi türk qəzeti olan "Açıq söz" əsas təbliğat vasitəsi olub.
