Kreml Sarayında “Min bir gecə” baleti nümayiş etdiriləcək

İyunun 21-də Rusiya Dövlət Kreml Sarayında dahi Azərbaycan bəstəkarı Fikrət Əmirovun “Min bir gecə” baleti nümayiş etdiriləcək.

“Kreml Baleti” Teatrının təqdim edəcəyi tamaşanın quruluşçu xoreoqrafı Rusiyanın Xalq Artisti Andrey Petrov, rəssamı SSRİ Xalq Rəssamı, akademik Tahir Salahovdur.

Azərbaycan Mədəniyyət Nazirliyinin dəstəyi ilə səhnələşdirilən tamaşa “Kreml Baleti”nin ifasında artıq uzun illərdir ki, təkcə Rusiyanın deyil, digər ölkələrin səhnələrində də uğurla nümayiş etdirilir. Bu, dahi Azərbaycan bəstəkarı Fikrət Əmirovun “Min bir gecə” baletinin Rusiyada ilk səhnə quruluşudur.

Tamaşa “Orfey” simfonik orkestrinin müşayiəti ilə nümayiş etdiriləcək.