Azərbaycan Ermənistan idmançılarının təhlükəsizliyinə təminat verir
“Düşünürəm ki, Ermənistan Bakıda keçiriləcək Avropa Olimpiya Oyunlarında da iştirak edəcək. Bununla bağlı Azərbaycan tərəfindən heç bir problem yoxdur”.
525.Az-ın “Trend” agentiliyinə istinadən yaydığı məlumata görə, bunu bu gün keçirilən mətbuat konfransında Milli Olimpiya Komitəsinin (MOK) vitse-prezidenti Çingiz Hüseynzadə deyib.
"Ermənilər Romada Avropa Olimpiya Komitəsi Baş Assambleyasının iclasında ümumiyyətlə səsvermədə iştirak etməkdən imtina etdi. Bu o demək deyil ki, ermənilər iştirak edəcək və ya etməyəcək. Biz bütün komandaların iştirakına və təhlükəsizliyinə təminat vermişik", - deyə Ç.Hüseynzadə bildirib.
MOK-un vitse-prezidenti qeyd edib ki, Avropa Olimpiya Oyunlarının yüksək səviyyədə təşkil edilməsi üçün Azərbaycanda bütün məsələlər Avropa qanunvericiliyinə uyğunlaşdırılmalı, yeni təhlükəsizlik sistemi qurulmalı, nəqliyyat sistemi yeniləşdirilməlidir: "Bakıda bir sıra idman növlərindən idmançılar iştirak edəcək. Azərbaycanda bəzi idman növləri yoxdur və biz çalışacağıq ki, 2 il yarım müddətində bu idman növlərini Azərbaycanda yaradaq və inkişaf etdirək".
Qeyd edək ki, Avropa Olimpiya Komitəsi 2015-ci ildə birinci Avropa Olimpiya Oyunlarının Bakıda keçirilməsi ilə bağlı qərar qəbul edib.
