AFFA üç futbolçuya 4 oyunluq cəza verdi
AFFA 1-ci liqada və 2-ci liqada mübarizə aparan komandaların üç futbolçusunu 4 oyunluq, 2 futbolçusunu isə 1 matçlıq cəzalandırıb.
QOL.az xəbər verir ki, bu gün keçirilən İntizam Komitəsi iclasında belə qərar qəbul edilib.
1-ci liqada 27-ci turun “Difai Ağsu” – “Zaqatala” oyununun 33-cü dəqiqəsində “Zaqatala” klubunun 8 nömrəli futbolçusu Roini İsmayılov təcavüzkar davranışa görə birbaşa qırmızı vərəqə aldığı üçün 4 oyun cəzalanıb, klub 300 manat cərimələnib.
1-ci liqanın “Şamaxı” – “Araz Saatlı” oyununun 83-cü dəqiqəsində “Araz Saatlı” klubunun 29 nömrəli futbolçusu Lamin Çam ikinci sarıdan qırmızı vərəqə aldığına görə 1 oyun cəzalanıb, “Araz Saatlı” klubu 50 manat cərimə edilib.
2-ci liqada 26-cı turun “Dinamo” – “Şəki Siti” oyununun 90-cı dəqiqəsində “Dinamo”nun 11 nömrəli futbolçusu Şahin Əliyev təcavüzkar davranışa görə birbaşa qırmızı vərəqə aldığı üçün 4 oyun cəzalanıb, klub 300 manat cərimə edilib.
Eyni oyunun 90-cı dəqiqəsində “Şəki Siti"nin 99 nömrəli futbolçusu Sərcan Omarov təcavüzkar davranışa görə birbaşa qırmızı vərəqə aldığı üçün 4 oyun cəzalanıb, klubu 300 manat cərimələnib.
Bu oyunda “Şəki Siti”nin 62 nömrəli futbolçusu Elnar Şabanov rəqibi aşkar qol imkanından məhrum etdiyinə görə birbaşa qırmızı vərəqə aldığı üçün 1 oyun cəzalanıb, “Şəki Siti” 80 manat cərimələnib.
