“Neftçi” “Səbail”dən güclü olub
Oktyabrın 2-də futbol üzrə Azərbaycan Premyer Liqasında VI turun növbəti oyunu keçirilib.
525.az xəbər verir ki, günün ikinci matçında son çempion "Neftçi" klubu "Səbail"in qonağı olub.
Qarşılaşma flaqmanın 3:1 hesablı qələbəsi ilə başa çatıb. "Ağ-qaralar"ın heyətində Yusuf Laval 26-cı dəqiqədə hesabı açıb. Qonaqların yeni transferi Tiaqo Bezerra 45+1-ci dəqiqədə fərqi iki topa çatdırıb. Braziliyalı hücumçu 78-ci dəqiqədə özünün ikinci komandasının üçüncü qoluna imza atıb. Matçın 90+5-ci dəqiqəsində Nikolas Raysel meydan sahiblərinin təsəlli qolunu vurub.
Qələbə sayəsində xallarının sayını 13-ə çatdıran "Neftçi" birinci pilləyə yüksəlib. Bir oyun az keçirən "Qəbələ" və "Qarabağ" 11 xalla 2-3-cü yerləri bölüşdürür. "Səbail" isə 6 xalla 5-ci sıradadır.
Qeyd edək ki, günün ilk görüşündə "Keşlə" evdə "Sabah"ı 2:0 hesabı ilə üstələyib. İlk oyun günündə "Zirə" evdə "Sumqayıt"ı məğlub edib - 1:0. Tura oktyabrın 3-də oynanılacaq "Qarabağ" - "Qəbələ" qarşılaşması ilə yekun vurulacaq.
