Bədən Tərbiyəsi və İdman Günü münasibətilə Gənclər və İdman Nazirliyi tərəfindən elan edilmiş “İdman həftəsi” çərçivəsində Qəbələdə kişi şahmatçılar arasında keçirilən yarış başa çatıb. Rayon Gənclər və İdman İdarəsinin təşkilatçılığı ilə Qəbələ Uşaq-Gənclər İdman-Şahmat Məktəbində keçirilən yarışda 20-dək şahmatçı mübarizə aparıb.
Qəbələ Rayon Gənclər və İdman İdarəsindən AZƏRTAC-ın bölgə müxbirinə bildirilib ki, yarışın açılış mərasimində idarənin rəisi Fəxri Soltanov çıxış edərək, iştirakçıları əlamətdar gün münasibətilə təbrik edib, ölkəmizdə idmanın inkişafına göstərilən yüksək dövlət qayğısından danışıb. Bildirilib ki, yarışın keçirilməsində məqsəd iştirakçıların ustalıq səviyyəsini artırmaq, rayonda idmanın kütləviliyinə nail olmaqdır.
Dairəvi sistem üzrə keçirilən yarışın yekun nəticələrinə əsasən, Araz Alməmmədov qalib adını qazanıb. Sonrakı yerləri İqbal Əsədov və Fərhad Əliyev tutublar.
Mükafatçılara rayon Gənclər və İdman İdarəsinin diplom və xatirə hədiyyələri təqdim edilib.