Qarabağda faydalı qazıntı yataqlarının qanunsuz istismarı əleyhinə Şuşa ərazisindən keçən Xankəndi-Laçın yolundakı etiraz aksiyası ruh yüksəkliyi ilə gecə saatlarında da davam edir.
525.az xəbər verir ki, 134 gündür aksiyaya fasilə verməyən eko-fəallar, vətəndaş cəmiyyətinin təmsilçiləri, könüllülər etirazlarını davam etdirir, müxtəlif şüarlar səsləndirirlər. Aksiya iştirakçıları Azərbaycanın Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulmasını böyük sevinc və coşqu ilə qarşılayıb.
Aksiya iştirakçılarının tələbləri dəyişməz olaraq qalır. Belə ki, eko-fəallar və gənc könüllülər “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, "Экоциду нет! Мониторингу да!" şüarlarını səsləndirirlər.
Azərbaycan Daxili İşlər Nazirliyi Daxili Qoşunlarının (DQ) əraziyə cəlb edilmiş hərbçiləri və polislər aksiya iştirakçılarının təhlükəsizliyini yüksək səviyyədə təmin edirlər.
Qeyd edək ki, aksiya ötən il dekabrın 12-dən başlayıb. Rusiya sülhməramlılarının nəzarətindəki yolun Şuşadan keçən hissəsində davam edən etiraz aksiyasında azərbaycanlı aktivistlər və ekologiya üzrə qeyri-hökumət təşkilatlarının (QHT) üzvlərinin əsas tələbləri Qarabağ iqtisadi rayonunda ekoloji terrora son qoyulmasıdır.
Loğman Avaz