Hindistanın Bakıdakı Hindistan Evində Beynəlxalq Yoqa Günü 2026 tədbirlərinin uğurla başa çatmasını qeyd etmək məqsədilə xüsusi “Power Yoga” sessiyası təşkil edib.

525.az xəbər verir ki, tədbirdə Azərbaycanın aparıcı media nümayəndələri və tanınmış sosial media influenserləri iştirak ediblər. Bu görüş media və rəqəmsal platforma nümayəndələrinin Hindistan və Azərbaycan arasında mədəni anlaşmanın təşviqində və dostluq əlaqələrinin möhkəmləndirilməsində oynadığı mühüm rolu bir daha vurğulayıb.

Tədbirin əsas hissəsini Hindistanın Azərbaycandakı səfiri Abhay Kumarın rəhbərliyi ilə keçirilən dinamik yoqa sessiyası təşkil edib. Ümumi Yoqa Protokolu əsasında hazırlanan proqram çərçivəsində müxtəlif yoqa asanaları, nəfəs məşqləri (pranayama) və meditasiya icra olunub. Məşğələ iştirakçılara yoqanın fiziki, zehni və emosional faydalarını bütöv şəkildə yaşamaq imkanı yaradıb.

İştirakçıları salamlayan səfir Abhay Kumar səfirliyin tədbir və təşəbbüslərinin işıqlandırılmasına göstərdikləri davamlı dəstəyə görə media nümayəndələrinə və sosial media influenserlərinə səmimi təşəkkürünü bildirib. Qeyd edib ki, onların fəaliyyəti Hindistanın zəngin mədəni irsinin daha geniş auditoriyaya çatdırılmasına, eləcə də Hindistan və Azərbaycan xalqları arasında qarşılıqlı anlaşmanın dərinləşməsinə mühüm töhfə verir.

Səfir yoqanı Hindistanın dünyaya bəxş etdiyi ən dəyərli irslərdən biri kimi xarakterizə edərək vurğulayıb ki, yoqa təkcə fiziki sağlamlığı deyil, həm də psixoloji rifahı, emosional dayanıqlılığı və daxili harmoniyanı inkişaf etdirir. Yoqa ilə media arasında maraqlı paralellər aparan Abhay Kumar bildirib ki, yoqa bədəni, zehni və ruhu birləşdirdiyi kimi, media da ideya və informasiya mübadiləsi vasitəsilə insanları, cəmiyyətləri və xalqları bir araya gətirir. Onun sözlərinə görə, həm yoqa, həm də məsuliyyətli jurnalistika cəmiyyətlər arasında körpülər qurmaq, dialoqu təşviq etmək, qarşılıqlı hörməti gücləndirmək, sülh və anlaşmanı inkişaf etdirmək gücünə malikdir.

Səfir, həmçinin bildirib ki, bu il Beynəlxalq Yoqa Gününə dünyanın müxtəlif ölkələrində rekord sayda insanın qoşulması yoqanın qlobal miqyasda artan nüfuzunu və universallığını bir daha nümayiş etdirib. O, Azərbaycanın da Səfirliyin yoqa təşəbbüslərinə böyük maraq göstərməsindən məmnunluğunu ifadə edərək, bunun iki ölkə arasında mədəni əlaqələrin və dostluğun daha da möhkəmlənməsinə xidmət etdiyini vurğulayıb.

Media nümayəndələri və sosial media influenserləri belə bir xüsusi tədbiri təşkil etdiyinə və onlara yoqanı interaktiv və mənalı formatda təcrübədən keçirmək imkanı yaratdığına görə Hindistan səfirliyinə təşəkkürlərini bildiriblər. Onlar yoqanın Azərbaycanda getdikcə daha çox populyarlıq qazandığını qeyd edərək, bu praktikanın yaşından, peşəsindən və dini mənsubiyyətindən asılı olmayaraq hər kəs üçün əlçatan və faydalı olduğunu vurğulayıblar. İştirakçılar həmçinin yoqanı fiziki sağlamlığın qorunması, psixoloji rifahın artırılması və sağlam həyat tərzinin təşviqi baxımından təsirli vasitə kimi yüksək qiymətləndiriblər.

Pərvanə Sultanova