|
|
|
|
Mayın 30-da Kolumbiya və Azərbaycan xarici işlər nazirlərinin Boqotada baş tutan görüşü zamanı Kolumbiya xarici işlər naziri Mariya Anxela Olgin Nazirlər Kabineti yanında Tərcümə Mərkəzinin və Kolumbiya səfirliyinin birgə ərsəyə gətirdiyi “İyirmi şeir” (Azərbaycan-Kolumbiya şeiri antologiyası) kitabını həmkarı Elmar Məmmədyarova təqdim edib.
Mərkəzdən 525.az-a verilən məlumata görə, nazir qeyd edib ki, toplunun işıq üzü görməsi Kolumbiya ilə Azərbaycan arasında münasibətlərə böyük töhfə verəcək. Məhz ədəbiyyat sahəsində irəli sürülən bu sayaq təşəbbüslər ölkələrimiz arasında anlaşmanın və dostluğun möhkəmlənməsində əsaslı rol oynayacaq.
Kitabda Kolumbiya ədəbiyyatı nümunələri dahi Azərbaycan şairləri Nizami Gəncəvi və İmadəddin Nəsiminin, həmçinin müasir Azərbaycan poeziyasının digər qələm sahiblərinin şeirləri ilə yanaşı təqdim olunur. Kitabın təqdimatı 13 iyun tarixində Bakıda baş tutacaq”.
Daha sonra E.Məmmədyarov “İyirmi şeir” kitabı ilə bağlı fikirlərini bölüşüb:
“Ərsəyə gəlmiş bu kitab Azərbaycan-Kolumbiya əlaqələrinin yüksələn xətt üzrə inkişafı üçün gözəl nümunə olacaq. Antologiya bizim düzgün istiqamətdə addımladığımızı göstərən vacib elementdir”.