Dünən parlamantdə komitələrin hökumətlə birgə büdcə müzakirələrində millət vəkili Zahid Oruc maliyyə naziri Samir Şərifova hər iki valideynini itirmiş bir tələbə ilə bağlı müraciət edib. Deputat bildirib ki, təhsil haqlarını ödəməkdən azad olunan şəxslər magistratura təhsilinin 1-ci ilini bitirdikdən sonra 23 yaşına çatdığından məlum güzəştdən məhrum olunurlar. "Bu isə dövlətin başlatdığı siyasətin uğurla sonuclanmasına mane olur və sözügedən tələbələrə ağır problem yaradır"-deyə, millət vəkili vurğulayıb.
Məsələ ilə bağlı Z.Orucun ətraflı məlumat verməsini xahiş etdikdə, o həqiqətən də müxtəlif elmi müsabiqələrdə qalib gəlmiş bir tələbə barəsində İqtisad Universitetinin rəhbərliyinə müraciət etsə də, onun təhsil ödənişinin yalnız dörddə birinə güzəşt olunacağı cavabını alıb və buna görə məsələni Milli Məclisin tribunasına gətirməyi məqsədəuyğun hesab edib: "Azərbaycan dövləti hər iki valideynini itirmiş şəxslərin təhsil almaq hüququnun gerçəkləşdirilməsi üçün müvafiq qanun qəbul edib.Söhbət 23 yaşınadək tələbələrin ödənişlərindən azad edilməsindən gedir.Etiraf etmək lazımdır ki,cəmiyyətin müxtəlif təbəqələrinin-xüsusilə də məcburi köçkünlərin və himayədən məhrum olunmuş insanların davamlı təhsil problemini həll etmək əslində Qarabağ müharibəsinin vurduğu böyük humanitar fəlakətin aradan qaldırılması siyasətinin tərkib hissəsidir.
Ölkə başçısı bu il ali məktəblərə qəbul olunan şəxslərin prezident təqaüdləri ilə təmin olunması haqqında xüsusi sərəncam imzalayarkən hər iki valideynini itirmiş 7 tələbəni də siyahiya daxil etməsi ilə təhsildə humanizmə,istedadlı gənclərə yardıma və kimsəsizi müdafiə etməsinə bariz nümunə sayılacaq ən yüksək addımdır. Ölkəmizin ali təhsil sistemində mühüm yeri olan İqtisad Universitetinin yeni rektoru isə hesab edir ki,himayədən məhrum olunmuş uşaqların gələcək ixtisaslı kadrlara çevrilməsi istisnasız olaraq onların təhsil haqlarını ödəməsindən keçir.
Dünyada məhşur universitetlərin istedadlı tələbələrə yüksək güzəştləri,hətta bütün təhsil xərclərindən tələbəni azad etməsi praktikasını elmi ictimaiyyət yaxşı bilir və bizim rektorların da bunu öyrənməsində bir fayda var. Günlər öncə müraciət etdiyim bir tələbənin timsalında şahidi oldum ki,istər qanunvericilik,istərsə də praktiki səviyyədə biz təhsil sistemində hələ çox iş görməliyik.İqtisad Universitetinin yeni rəhbərliyi ola bilsin müəllim-tələbə münasibətlərində mövcud olan neqativ halları aradan qaldırmaq üçün hansısa addımlar atır,lakin doğrudanmı bunlar təhsilinin fundamental prinsiplərinə xidmət edir? Yəqin əvvəlki rekrorların Ulu öndərlə və Prezident İlham Əliyevlə görüşlərini özündə əks etdirən fotostendləri divardan açıb götürmək və idarəçilikdə normal varislik ənənələrinin yaranmasına yol verməmək də eyni dərəcədə "təhsil islahatı" kimi təqdim olunur. Halbuki kimsəsiz və gəlir mənbəyini itirmiş əlaçı tələbələrə təhsillərini davam etdirmək üçün yollar aramaq hər bir elmi müəssisənin başlıca vəzifəsidir. Mən büdcə müzakirələri zamanı qaldırdığım məsələnin müsbət həlli üçün Təhsil Nazirliyinə,Elmin İnkişafı və Bilik Fonduna müraciət etmişəm. Ümidvaram ki,təmsil etdiyim bölgədən olan bir tələbənin magistratura təhsilini uğurla başa vurması üçün müvafiq dövlət orqanlarından arzuladığımız dəstəyi ala biləcəyik".
Kamil HƏMZƏOĞLU