|
|
|
|
Əfqanıstanda hakimiyyəti ələ keçirən “Taliban” hərəkatı ABŞ-a vaxt qoyub.
525.az-ın məlumatına görə, “Taliban” nümayəndəsi Süheyl Şahin “Sky News” telekanalına müsahibəsində bildirib ki, ABŞ və Böyük Britaniyaya təxliyə üçün əlavə vaxt verilməyəcək, əks halda bunun fərqli nəticələri olacaq.
“Taliban” nümayəndəsi bildirib ki, ABŞ və Böyük Britaniya təxliyə üçün əlavə vaxt istəsə, onlara mənfi cavab veriləcək: “Bu, aramızda etimadsızlıq yaradacaq. Onlar işğalı davam etmək niyyətində olsalar, bu, adekvat reaksiya doğuracaq”.
“Bu, “qırmızı xətdir”. Prezident Bayden bəyan edib ki, avqustun 31-dək bütün silahlı qüvvələri Əfqanıstandan çıxaracaqlar. Ona görə də əgər onlar qeyd olunan müddəti uzatsalar, bu, işğalın genişləndirilməsi demək olacaq ki, buna da ehtiyac yoxdur”, - deyə S. Şahin qeyd edib.
Qeyd edək ki, “Taliban” hərəkatının avqustun 15-də paytaxt Kabili tutması ilə Prezident Əşrəf Qani ölkəni tərk edib.
Avqustun 16-da “Taliban”ın siyasi ofisinin nümayəndəsi Məhəmməd Naim Əfqanıstanda müharibənin başa çatdığını bildirib.
Firuzə Əliyeva