Norveçin Baş naziri Störe Avropada “enerji millətçiliyi” ilə bağlı xəbərdarlıq edib

Norveçin Baş naziri Conas Gahr Störe xəbərdarlıq edib ki, enerji böhranı Avropada daha çox “enerji millətçiliyinə” səbəb ola bilər. "Hazırda düşmüş olduğumuz kritik vəziyyətdə, elektrik enerjisi və qazın yüksək qiymətləri sadə insanlara, sənayeyə, biznesə və iqtisadiyyata təsir göstərdiyindən, hamımızın milli şərait və elektrik enerjisini necə təmin etdiyimizlə daha çox maraqlanmaq təhlükəsi var". 

525.az xəbər verir ki, Störe bu sözləri Norveçin NTB xəbər agentliyinə bildirib. Enerji böhranının hər bir ölkənin öz ehtiyaclarına üstünlük verməsinə səbəb ola biləcəyini deyən Störe, bəzi Avropa ölkələrinin geridə qalmasının qarşısını almaq üçün ölkələr arasında əməkdaşlığın vacib olduğunu söyləyib. 

Norveçin qonşu ölkələrlə enerji paylaşmağa davam edəcəyini vurğulayan Störe: "Hər ölkənin öz qapalı sistemi olsaydı, aclıq dövrlərini qarşılamaq üçün çox böyük ehtiyatlar yaratmalı olardıq. İndi bu yaxşı tarazlığı qurmağı bacardıq və biz bunu etməliyik", - deyə açıqlamasında bildirib.

Qazın qiymətinin Ukraynadakı müharibədən əvvəlki səviyyəyə çatdığına toxunan Störe: "Avropa İttifaqında əməkdaşlığın nə qədər irəlilədiyini anlamağa dəyər. Aİ liderləri qiymətləri aşağı sala bildi və qərar qəbul etdi", - deyib. 

Qeyd edək ki, Norveç böhran dövründə kifayət qədər elektrik enerjisinə sahib olmaq üçün Avropaya elektrik enerjisi ixracını azaltmaq planının bir hissəsi kimi yaratmaq istədiyi "idarəetmə mexanizmi"nə görə Skandinaviya qonşuları və Aİ tərəfindən tənqid edilib. Störe isə bununla bağlı heç bir tənqid almadığını bildirib.

Malik Atilay