“Zirə”nin baş məşqçisi Ayxan Abbasov Topaz Premyer Liqanın 21-ci turunda “Neftçi”ylə oyundan sonra mətbuat konfransı keçirib.
Qol.az-ın xəbərinə görə, gənc mütəxəssis komandasının 2:1 hesabı ilə qalib gəldiyi matçla bağlı fikirlərini bildirib.
- Oyuna ciddi hazırlaşmışdıq. Xal fərqinə baxsaq bizim üçün önəmli oyunlardan biri idi. Bərabərlik bizə sərf etsə də, qalib gəldik. Futbolçularıma təşəkkür edirəm. Qış fasiləsindən sonra komandamız xarakter nümayiş etdirir.
- Bu qələbə sayəsində "Zirə"nin 4-cü yerdə mövqeyini möhkəmləndirdi.
- Sona qədər bu tempi saxlasaq, mövsumu 4-cü yerdə başa vura bilərik. Təzyiq çox olacaq, amma buna dözməliyik. Bu, futboldur. Hər şey ola bilər.
- Komandanızın qarşısına avrokuboklara düşmək vəziifəsi qoyulub?
- Mənə bu vəzifə təklif ediləndə qarşıma məqsəd qoyulmuşdu ki, komanda ötənilki oyunu nümayiş etdirsin. Mən də bunun üçün çalışıram. Hər bir komanda avrokuboklara düşmək istəyər. Çalışarıq ki, maksimum xal götürüb vəsiqəni təmin edək.
- Oyunun gedişatında azarkeşlərlə aranızda nəsə mübahisə oldu...
- Azarkeşlər nalayiq ifadələr işlədirlər. Mən də futbolçularıma deyirəm ki, heç kimə cavab verməsin. Azarkeşlər çoxu deyir ki, "Qarabağ"ın ikinci komandasıyıq. "Qarabağ"a bilərəkdən xal verənə də, bu fikri uydurana da Allah lənət eləsin.
- Bu söhbətə son qoymaq üçün düşünmürsüz ki, 4-cü dövrədə "Qarabağ"a qalib gələsiz...
- Bugünkü söhbətlər istər-istəməz futbolçularda gərginlik yaradır. Hər bir oyunun videogörüntüsü var, gətirsinlər, göstərsinlər ki, hansı oyunu vermişik. Biz "Qarabağ"a qarşı oynayacağıq. Kim istəməz ki, qalib gəlməsin. Düzdü, oyunçular "Qarabağ”dan qorxurlar. Ancaq bu, təkcə bizə aid deyil.
- Oyunçuların "Qarabağ”dan qorxduğunu dediniz. Bəs komanda avrokuboklara vəsiqə qazansa, orda necə olacaq?
- "Qarabağ” bu gün ölkənin ən güclü komandalarındandır. Biz "Qarabağ”, "Qəbələ” kimi komandalardan geri qalırıq. Ancaq bu demək deyil ki, onlara tam təslim oluruq. Yenə deyirəm, o komandayla bizim aramızda heç bir yaxınlıq yoxdur. Dostluq, qardaşlıq başqa şeydir. Lakin bu söz-söhbətlərin heç bir əsas yoxdur.
- Kamal Bayramovun oyunu belə deməyə əsas verirmi ki, Anar Nəzirov əsas heyətdən kənarda qalacaq?
- Anar qırmızı vərəqəylə bağlı əvvəlki oyunlarda kənarda qalmışdı. Komandada iki yaxşı qapıçının olması sevindiricidi. Bu gün Kamalın yaxşı oyunu o demək deyil ki, Anar oynamayacaq.