Müddətli həqiqi hərbi xidməti başa vurmuş sərhədçi əsgərlər Silahlı Qüvvələrin ehtiyatına buraxılıblar
Dövlət Sərhəd Xidmətinin (DSX) struktur qurumlarında və hərbi hissələrində Prezident, Silahlı Qüvvələrin Müzəffər Ali Baş Komandanı İlham Əliyevin müvafiq Sərəncamına əsasən müddətli həqiqi hərbi xidməti başa vurmuş hərbi qulluqçuların Silahlı Qüvvələrin ehtiyatına buraxılması münasibətilə təntənəli tədbirlər keçirilib.
525.az-a bu barədə DSX-nin mətbuat mərkəzindən məlumat verilib.
Bildirilib ki, hərbi hissələrin əsgəri şücaət, şərəf və şan simvolu olan Döyüş bayrağının sıra meydanına gətirilməsi ilə başlayan tədbirlərdə Dövlət Himni səsləndirilib, Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib.
Tədbirlərdə çıxış edənlər hərbi xidməti başa vurmuş sərhədçi əsgərlərin dövlət sərhədlərinin etibarlı mühafizəsinin təmin edilməsində üzərlərinə düşən vəzifələri yüksək məsuliyyət, ayıq-sayıqlıq və peşəkarlıqla yerinə yetirdiklərini vurğulayıblar.
Qeyd olunub ki, onların hərbi xidmət dövründə nümayiş etdirdikləri nizam-intizam, vətənpərvərlik, hərbi anda sədaqət və xidmətə vicdanlı münasibəti Vətənə layiqli xidmət nümunəsi kimi yüksək qiymətləndirilir.
Xidmət dövründə müsbət keyfiyyətlərinə görə fərqlənmiş hərbi qulluqçular təltif edilib, Silahlı Qüvvələrin ehtiyatına buraxılan əsgərlər onlara göstərilən etimada, qazandıqları bilik və bacarığa görə minnətdarlıqlarını ifadə ediblər.
Mərasimlərə dəvət olunan əsgər valideynləri övladlarına göstərilən diqqət və qayğıya, yaradılan nümunəvi xidmət və məişət şəraitinə görə təşəkkür ediblər.
Tədbirlərin sonunda sərhədçi əsgərlər təntənəli şəkildə yola salınıblar.
