Azərbaycan xalqı özünün çoxəsrlik tarixi prosesində ümumbəşəri fikrin inkişafına, ideya və konsepsiyaların daha da zənginləşməsinə qiymətli töhfələr verib, dünya mədəniyyətinin və sivilizasiyasının tərəqqisi prosesində əhəmiyyətli rol oynayıb.
Müstəqil Azərbaycan Respublikasının mədəniyyət strukturunda kitab və kitabxana mədəniyyəti mühüm yer tutur. Respublikamızda mədəniyyətin ayrılmaz tərkib hissəsi kimi kitabxana-informasiya fəaliyyətinin inkişafı naminə qlobal dövlət siyasəti aparılır. Əsası ümummilli lider Heydər Əliyev tərəfindən qoyulan və onun siyasi xəttinin layiqli davamçısı, Prezident İlham Əliyev tərəfindən uğurla həyata keçirilən bu siyasət nəticəsində ölkəmizdə kitabxana-informasiya fəaliyyətinin möhkəm hüquqi bazası formalaşdırılıb, sahənin kompleks inkişafını özündə ehtiva edən ali ümumdövlət sənədləri qəbul edilib.
Dünyanın böyük mütəfəkkirləri, elm və mədəniyyət xadimləri mədəniyyətin inkişafında kitabın və kitabxananın əhəmiyyətini yüksək qiymətləndirib, kitabın şəninə bilik mənbəyi, cəmiyyətin inkişafının, tərəqqisinin əsas vasitəsi kimi fikirlər söyləyiblər. Kitabxanaların inkişaf və təkamül yolu kitab mədəniyyətinin yaranması, formalaşması və təkmilləşməsi yolundan keçib, kitab toplamaq, onun kolleksiyasını yaratmaq, onu qoruyub saxlamaq, gələcək nəsillərə ötürmək qaydaları meydana gəlib, bəşəri təcrübəyə çevrilib. Zaman keçdikcə, tarixi inkişaf prosesində cəmiyyətin mədəni səviyyəsi yüksəldikcə, cəmiyyətin idarə edilməsində sənədə və kitaba ehtiyac artıb.
Məhz bu baxımdan da müasir şəraitdə qədim və zəngin kitab və kitabxana mədəniyyətinə malik olan ölkəmizdə bu mədəniyyətin ensiklopediyasının hazırlanması dövlətin mühüm mədəniyyət siyasəti prioriteti kimi müəyyənləşdirilərək, olduqca ciddi aktuallıq kəsb edən Azərbaycan Kitabxana Ensiklopediyası hazırlanıb. Qətiyyətlə deyə bilərik ki, Azərbaycan Kitabxana Ensiklopediyası Müstəqil Azərbaycan Respublikasında mədəniyyətin inkişafı, informasiya mühitinin optimallaşdırılması, müasir informasiyalaşdırılmış cəmiyyətə keçidin təmin edilməsi istiqamətində həyata keçirilən qlobal mədəniyyət siyasətinin səmərəli nəticəsidir.
Azərbaycan Respublikasının Prezidenti cənab İlham Əliyevin imzaladığı "Azərbaycan Respublikasında kitabxana-informasiya sahəsinin 2008-2013-cü illərdə inkişafi üzrə Dövlət Proqramı"na müvafiq olaraq Azərbaycan Respublikasının Mədəniyyət və Turizm Nazirliyi ilə Azərbaycan Milli Kitabxanasının birgə layihəsi kimi nəşr olunaraq bu günlərdə oxuculara təqdim olunan ensiklopediyanın layihə rəhbəri Azərbaycan Respublikasının Mədəniyyət və turizm naziri Əbülfəs Qarayev, baş redaktoru M.F.Axundov adına Azərbaycan Milli Kitabxanasının direktoru, professor Kərim Tahirov, elmi redaktoru Azərbaycan milli kitabxanaşünaslıq elminin banisi, Əməkdar elm xadimi, tarix elmləri doktoru, professor Abuzər Xələfovdur.
Ensiklopediyanın redaksiya heyətinin və işçi qrupunun tərkibinə respublikamızın aparıcı elmi kitabxanalarının rəhbərləri və aparıcı mütəxəssisləri, BDU-nun Kitabxanaçılıq-informasiya fakültəsinin dekanı və kafedra müdirləri daxildirlər. Bu fundamental ensiklopedik nəşr həmin aparıcı mütəxəssislərin və kitabxanaşünas-biblioqrafiyaşünas alimlərin birgə gərgin əməyinin, 5 illik ciddi elmi axtarışlarının və yaradıcı təxəyyülünün məhsulu hesab edilə bilər.
Təkcə kitabxana-biblioqrafiya və informasiya ictimaiyyəti üçün deyil, bütövlükdə Azərbaycan mədəniyyəti üçün əhəmiyyətli tarixi nailiyyət hesab olunan Azərbaycan Kitabxana Ensiklopediyası bir mədəniyyət abidəsi kimi mədəniyyətimizin tərkib hissəsi olan kitabxana-informasiya fəaliyyətinin elmi-praktiki uğurlarını və perspektiv inkişafını dərin ümumiləşdirmə və sistemləşdirmələr əsasında özündə əks etdirir.
Unikal bir sahə ensiklopediyasının - Azərbaycan Kitabxana Ensiklopediyasının hazırlanaraq nəşr edilməsi böyük yaradıcı zəhmətin, ciddi təşkilatlanma və fundamental tədqiqatların uğurlu bəhrəsidir. Bu ensiklopediya öz mahiyyəti etibarilə milli mədəniyyətimizin müasir mərhələdə əldə etdiyi əhəmiyyətli uğur, kompleks xarakterli ümummilli mədəni hadisə, elmi-nəzəri, metodik və təcrübi tədqiqatların məntiqi yekunu kimi yüksək dəyərə malikdir. Ensiklopediya kitabxana-informasiya fəaliyyəti sahəsində əsrlərdən bəri formalaşmış bilikləri ümumiləşdirmək, sistemləşdirmək və təbliğ etməklə yanaşı, bu sahənin hazırkı dövr üçün inkişafını, sahənin aparıcı kadrlarının intellektual potensialını müəyyən edir və gələcək tarix üçün sənədləşdirir ki, məhz bu faktor da nəşrin ümumi konseptual mahiyyətinin məzmun dərinliyi və perspektiv xəttinin praqnostizminin dolğunluğunu və əsaslılığını göstərir.
Xüsusilə qeyd etmək lazımdır ki,Azərbaycan Kitabxana Ensiklopediyasının nəşri Azərbaycanda Kitabxana-informasiya fəaliyyətinə dövlət qayğısının, milli siyasətdə mədəniyyətin inkişaf konsepsiyasına ideoloji-siyasi və hüquqi istiqamətin tamamilə düzgün müəyyənləşdirilməsinin, kitabxana-informasiya fəaliyyətinin hüquqi bazasının fundamentallığının və kitabxana-informasiya elmlərinin inteqrasiyalı və diferensasiyalı inkişafının məntiqi nəticəsi zəminində baş tutmuşdur. Ensiklopediya keçmiş SSRİ məkanında Rusiya Federasiyasından sonra yaradılmış ikinci milli ensiklopediyadır. Milli ensiklopediyamız, məzmun və mövzunun əhatə dairəsinə görə daha modernliyi, geniş məzmunluluğu, nəzəri fundamentallığı, metodiki mükəmməlliyi, xronoloji əhatə dairəsi, teazurus çoxmənalılığı, semantik funksionallığı, praqmatik adekvatlığı ilə Rusiya Ensiklopediyasından fərqlənir.
Azərbaycan Kitabxana Ensiklopediyasında cəmiyyətimizdə son dövrlərdə baş verən əhəmiyyətli sosial, siyasi, texnoloji və iqtisadi dəyişikliklər, qlobal reformlar və onların təsiri altında kitabxana-informasiya fəaliyyətində yaranan yeni mütərəqqi innovasiyalara, elmi-texniki nailiyyətlərin nəticələrinə və həmin nəticələrin praktikaya tətbiqindən doğan mühüm faktlara daha çox yer verilmişdir.
Bəşəriyyətin sonuncu informasiya inqilabı hesab olunan İnformasiya cəmiyyətinin formalaşaraq getdikcə sürətli inkişafı və bu dinamik qlobal prosesin tələblərindən doğan texnoloji layihələr, anlayışlar, yeni informasiya məhsulları və xidmətləri, onların məzmun və mahiyyət nüvəsi, funksional komponent strukturu, müasir qiymətləndirmə mexanizmi və perspektiv inkişaf istiqamətləri ensiklopediyada öz əksini tapmışdır. Burada digər bir mühüm məqam ensiklopediyada toplanmış məqalələrin böyük əksəriyyətinin əsasən müvafiq kontekstdə kompleks mövzu və problemlərə həsr edilməsidir.
Əvvəldə də vurğuladığımız kimi, öz nəzəri fundamentallığı, məzmun kompleksliyi, əhatə xronologiyasının genişliyi, metodoloji mükəmməlliyi ilə əlamətdar olan Azərbaycan Kitabxana Ensiklopediyasını Rusiyanın müvafiq ensiklopediyası ilə müqayisə etdikdə, məhz Azərbaycan Ensiklopediyasının daha çox informativ xarakter daşıdığı aydın müşahidə olunur. Bundan fərqli olaraq, Rusiya Ensiklopediyasında kulturoloji aspekt daha qabarıq müşahidə olunur ki, bu da bir daha kompleks informasiya xarakteri etibarilə, məhz Azərbaycan ensiklopediyasının daha zəngin olmasını tam aydınlığı ilə ortaya qoyur.
Milli dövlətçiliyimizə, müəllifi xalqımızın ümummilli lideri, dünya siyasətinin nəhəng siması, görkəmli dövlət xadimi, ulu öndər Heydər Əliyev olan, milli ideologiyamıza - azərbaycançılıq ideologiyasına, azərbaycançılıq fəlsəfi konsepsiyasına xidməti baxımından da Azərbaycan Kitabxana Ensiklopediyasının ana xəttini milli-tarixi dəyərlərə hörmət, mental xarakterə sədaqət, müasirlik və demokratik prinsiplərə tolerant yanaşma təşkil edir.
Azərbaycan Kitabxana Ensiklopediyasında nəzəri cəlb edən daha bir mühüm cəhət burada kitabxana-informasiya fəaliyyətinin inkişafında böyük əməyi olmuş şəxslər haqqında məqalələrin yer almasıdır. Bu onların əməyinə verilən əhəmiyyətli qiymət və xatirələrinə ucaldılmış mədəni abidə kimi xüsusi dəyər ehtiva edir.
Ensiklopediyada mədəniyyət və onun tarixi haqqında, kitab və kitabxana tarixi haqqında, 50-dən artıq dünyanın qabaqcıl kitabxanaları haqqında, beynəlxalq kitabxana təşkilatları haqqında, kitabxana-informasiya fəaliyyətinin hüquqi-normativ bazası haqqında, eləcə də, müvafiq istiqamətdə mühüm əhəmiyyət kəsb edən digər aspektlər haqqında çoxsaylı dolğun məqalələr də öz əksini tapmışdır ki, bu da bütövlükdə Azərbaycan mədəniyyətinin inkişafı üçün olduqca qiymətli elmi-nəzəri, metodik və təcrübi əhəmiyyətə malik olan ciddi hadisə kimi qiymətləndirilməyə tamamilə layiqdir.
Ensiklopediyada daha bir mühüm məsələ kitabxana-informasiya elmləri üzrə elmi-dövri mətbuat nəşrləri və ya məqalələrinin yer almasıdır. Bu məlumatlar müvafiq sahə mütəxəssisləri üçün konseptual əhəmiyyət kəsb edərək sahənin informasiya təminatının təşkili və istiqamətləndirilməsi, kommunikativ axtarışın imkanlarının genişləndirilməsi və funksional parametrlərinin məqsədəuyğun fəaliyyət göstərməsi üçün daha əlverişli şəraitin yaradılmasına mühüm töhfədir.
Beləliklə, qətiyyətlə demək olar ki, belə bir kompleks fundamental soraq-məlumat kitabının hazırlanaraq ərsəyə gətirilməsi üçün böyük elmi-təşkilati proses həyata keçirən peşəkar və mobil komandanın, yaradıcı kollektivin gərgin əməyi olduqca böyük minnətdarlıqla qiymətləndirilməlidir. Məhz bu komandanın gərgin axtarışlarla, fundamental tədqiqatlarla əlamətdar olan məhsuldar əməyi, böyük yaradıcı ruhu, milli mədəniyyətimizin və Vətən elmimizin inkişafı naminə əzmkar fəaliyyəti bu gün bizə Milli Kitabxana Ensiklopediyasının nəşr sevincini və iftixarını yaşadır.
İnanırıq ki, bu Ensiklopediya təkcə kitabxanaçıların və biblioqrafların deyil, bütövlükdə mədəniyyət, kitab və nəşriyyat sahəsi mütəxəssislərinin stolüstü kitabına çevriləcək, onlara yolgöstərən mayaka çevriləcəkdir.
Azad QURBANOV
BDU-nun Kitabxanaçılıq-informasiya fakültəsinin dekanı