Azərbaycan Premyer Liqasının doqquzuncu turunda lider «Simurq»un səfərdə «İnter»ə məğlubiyyəti (0:1) Zaqatala klubunun azarkeşlərinin narazılığına səbəb olub.
Qol.Az-ın məlumatına görə, azarkeşlər komandalarının Bakı təmsilçisinə bilərəkdən uduzduğunu iddia ediblər. Onlar oyunun sonlarında bununla bağlı şüarlar da səsləndirib, baş məşqçini istefaya səsləyiblər.
«Simurq»un bir qrup azarkeşi Qol.Az-ın müxbiri ilə söhbətində bildirib ki, cari çempionatda «Xəzər Lənkəran», «Qarabağ» kimi iddialı komandalardan xal alan Zaqatala klubunun «İnter»ə ciddi müqavimət göstərmədən uduzması müəyyən şübhələr yaradır.
«Bu onu göstərir ki, «Simurq»un «İnter»in kiçik qardaşı olması haqda deyilənlər yalan deyil. Komandamız hər dəfə «İnter»lə oyunda uduzur. Biz buna görə klub rəhbərliyinə, futbolçuları və məşqçi heyətinə kəskin etirazımızı bildiririk».