Millət vəkili: “...Bəzi məktəblərdə şərait hələ də qənaətbəxş deyil”
“Noyabrın 30-da qəbulu gözlənilən 2013-cü ilin dövlət büdcəsi Azərbaycanın iqtisadi qüdrətini real olaraq ifadə edir, o cümlədən uzun illərdir həyata keçirilən proqramlar çərçivəsində işlərin davamını şərtləndirir”.
Bunu “525”-ə açıqlamasında Milli Məclisin üzvü, Bakı Slavyan Universitetinin prorektoru Sahibə Qafarova gələn ilin dövlət büdcəsi haqqında fikirlərini bildirərkən səsləndirib. Onun sözlərinə görə, parlamentdə çıxışı zamanı bildirdiyi kimi, Azərbaycanda Prezident İlham Əliyevin təşəbbüsü ilə 2004-cü ildən etibarən “Regionların sosial-iqtisadi inkişafına dair Dövlət Proqramı” uğurla həyata keçirilir və bu proqramın həyata keçirilməsinin nəticəsi olaraq regionların həm iqtisadi, həm də infrastruktur göstəriciləri müsbət mənada əhəmiyyətli dərəcədə dəyişib. Millət vəkili eyni zamanda deyib ki, regionlarda iqtisadi fəallıq, sahibkarlıq fəallığı artıb və təbii ki, yaradılan infrastruktur, sahibkarlığın inkişafı üçün formalaşdırılan şərait regionlarda iqtisadi göstəricilərin artmasına səbəb olub:
“Beləliklə, Azərbaycanda “Regionların sosial-iqtisadi inkişafına dair Dövlət Proqramı”nın uğurla həyata keçirilməsi sayəsində əhəmiyyətli mərhələlər keçilib. Biz bu istiqamətdə əldə olunan dəyişikləri bütün sahələrdə, infrastruktur layihələrinin icrasında, yeni müəssisə və zavodların, yeni iş yerlərinin açılmasında, vətəndaşların sosial həyat səviyyəsinin yaxşılaşmasında da görürük. O cümlədən, bölgələrdə təhsilin səviyyəsinin artırılması istiqamətində görülən işlərin də nəticələri müsbətdir. Gələn ilin dövlət büdcəsindən bu sahəyə ayrılacaq vəsait ölkəmizdə son illərdə təhsilin inkişafı ilə bağlı həyata keçirilən tədbirlərin daha effektiv nəticələr verməsinə də xidmət edəcək”.
S.Qafarovanın qeyd etdiyinə görə, hazırda ölkəmizdə məktəblərin maddi-texniki bazasının gücləndirilməsi istiqamətində də mühüm işlər görülüb: “Çıxışımda da bildirdim ki, bu proses təkcə paytaxt ilə məhdudlaşmır, ən ucqar bölgələri də əhatə edir. Təsadüfi deyil ki, son bir neçə ildə respublika ərazisində heç bir dövrdə müşahidə olunmadığı qədər məktəb binası tikilib, bir çox məktəb binaları üçün yeni korpuslar inşa olunub, köhnə tədris müəssisələri bərpa və əsaslı təmir edilib. Həmçinin, millət vəkili seçildiyim Şəmkir rayonunda da orta məktəblərin bazasının möhkəmləndirilməsi istiqamətində bir sıra mühüm işlər göürülüb, bəzi şəhər və kənd məktəbləri əsaslı şəkildə yenidən qurularaq istifadəyə verilib. Bununla yanaşı, bəzi məktəblərdə şərait hələ də qənaətbəxş deyil. Xüsusən, Azərbaycanın təhsilinin inkişafında müstəsna xidmətlər göstərmiş savadlı və bilikli kadr hazırlığında iştirak etmiş bir neçə alimimizin təhsil aldığı Nizami adına şəhər orta məktəbinin və Çinarlı qəsəbə orta məktəbinin təmirinə ciddi ehtiyac var. Həmçinin, bir sıra məktəbəqədər təhsil müəssisələri-uşaq baxçalarında da vəziyyət arzuolunan səviyyədə deyil və bununla bağlı, seçicilərimizdən kifayət qədər müraciətlər daxil olur, bu məsələ dəfələrlə bizim görüşlərimizdə qaldırılır. Görünür ki, bu problem insanları narahat edir və həlli vacibdir. Ona görə də mən parlamentdəki çıxışımda da büdcədən Şəmkir rayonunda fəaliyyət göstərən bəzi təhsil müəssisələrinin, xüsusən , adını çəkdiyim iki orta məktəbin yenidən qurulması və təmiri məsələlərinə də diqqət ayrılmasını xahiş etdim”.
Ümumiyyətlə isə millət vəkili hesab edir ki, gələn ilin dövlət büdcəsi sosial yönümlü olmaqla ölkəmizin qarşısında duran məsələlərin həllinə də gözəl imkan yaradır.
Kamil Həmzəoğlu
