Beyləqanda görkəmli ədəbiyyatşünas Əsəd Cahangirlə ədəbi-bədii görüş keçirilib
9 iyul 2026-cı il tarixdə Beyləqan Rayon İcra Hakimiyyətinin təşkilatçılığı ilə Mədəniyyət Mərkəzində görkəmli ədəbiyyatşünas, yazıçı-publisist, tənqidçi və şair Əsəd Cahangirin 60 illik ədəbi-bədii yubiley tədbiri keçirilib.
Tədbirdə Beyləqan Rayon İcra Hakimiyyətinin başçısı Əziz Əzizov, Rayon Məhkəməsinin sədri Ramiz Nurullayev, Milli Məclisin deputatı Səyyad Aran, Azərbaycan Yazıçılar Birliyinin Beyləqan Bölməsi, idarə, müəssisə və təşkilatların kollektivləri, ziyalılar, ədəbiyyat və mədəniyyət nümayəndələri, ağsaqqallar, şəhid ailələrinin üzvləri, gənclər və rayon ictimaiyyətinin nümayəndələri iştirak ediblər.
Tədbir Azərbaycan Respublikasının Dövlət Himninin səsləndirilməsi və Vətənimizin ərazi bütövlüyü uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi ilə başlayıb. Tədbirin aparıcısı, yazıçı-publisist İlqar Fəhmi yubilyarın zəngin həyat və yaradıcılıq yolundan, Azərbaycan ədəbi fikrinin inkişafına verdiyi mühüm töhfələrdən bəhs edib. Ardınca iştirakçılar Əsəd Cahangirin ömür və yaradıcılıq salnaməsini əks etdirən “Sözün Cahangiri” videoçarxını izləyiblər. Tədbir boyu yubilyarın sözlərinə bəstələnmiş mahnılar səsləndirilib, şeirləri qiraət olunaraq yaradıcılığına ehtiram ifadə edilib.
Tədbirdə çıxış edən Beyləqan Rayon İcra Hakimiyyətinin başçısı Əziz Əzizov bildirib ki, Beyləqan torpağı ölkəmizə görkəmli elm, ədəbiyyat və mədəniyyət xadimləri bəxş edib, əvvəlki illərdə də Beyləqanın yetirdiyi tanınmış söz adamlarının həyat və yaradıcılığına həsr olunmuş silsilə tədbirlər təşkil edilib. Bu ənənənin davamı olaraq, əslən Beyləqandan olan görkəmli ədəbiyyatşünas Əsəd Cahangirin 60 illik yubileyinin yüksək səviyyədə qeyd olunması onun Azərbaycan ədəbiyyatındakı zəngin xidmətlərinin yüksək qiymətləndirilməsinin ifadəsidir. Rayon rəhbəri yubilyarın yaradıcılığından bir neçə nümunələrin adını çəkərək bu əsərlərin gənc nəslin milli-mənəvi tərbiyəsində xüsusi əhəmiyyət daşıdığını vurğulayıb, ona yeni-yeni uğurlar arzulayaraq Azərbaycan ədəbiyyatının inkişafına verdiyi dəyərli töhfələrə görə, həmçinin 60 illik yubileyi münasibətilə ona Beyləqan Rayon İcra Hakimiyyətinin Fəxri Fərmanını və hədiyyə təqdim edib.
Sonra Milli Məclisin deputatı, yazıçı-publisist Səyyad Aran, şair Sona Çərkəz, Sabunçu Rayon Ağsaqqallar Şurasının sədri, şair Vəli Qaraçaylı, yazıçı-publisist Şəfəq Nasir, yazıçı-publisist Düzgün Atalı, araşdırmaçı-folklorist Hümbət Məmmədli, yazıçı-publisist Şamil Ənvəroğlu, şair Nicat Ərtürk, AYB Beyləqan Bölməsinin sədri Fazil Əsəd, şair Rövşən Qarabudağ, Beyləqan Rayon Ağsaqqallar Şurasının sədri Etibar İmanov, Yuxarı Aran kənd tam orta məktəbinin direktoru Sahilə Fərmanzadə, yazıçı-publisist İradə Aytel və digər çıxışçılar Əsəd Cahangirin çoxşaxəli yaradıcılığından, Azərbaycan ədəbiyyatının inkişafındakı xidmətlərindən, yüksək insani keyfiyyətlərindən və gənc ədəbi nəslin formalaşmasına verdiyi töhfələrdən söz açaraq yubilyarı təbrik edib, ona yeni yaradıcılıq nailiyyətləri arzulayıblar.
Musiqili-bədii proqramla müşayiət olunan tədbirin sonunda Əsəd Cahangir çıxış edərək yubileyinin yüksək səviyyədə təşkilinə görə Beyləqan Rayon İcra Hakimiyyətinə, digər təşkilatçılara və tədbir iştirakçılarına təşəkkürünü bildirib. O, göstərilən diqqət və ehtiramı yaradıcılığına verilən yüksək dəyərin ifadəsi kimi qiymətləndirərək, bu doğma münasibətin onun üçün xüsusi mənəvi əhəmiyyət daşıdığını vurğulayıb.
Rövşən Qarabudaq
