Ötən həftə Mədəniyyət Nazirliyinin təşkilatçılığı ilə bu il “Azərbaycanın Əfsanələr Paytaxtı” elan edilən Gədəbəy rayonuna infotur gerçəkləşdi. Səfər “Əfsanələr Paytaxtı” ilində bölgədə həyata keçirilən işlərlə tanış olmaq məqsədi daşıyırdı. İnfoturda Mədəniyyət siyasəti şöbəsinin müdiri Fikrət Babayev, şöbənin aparıcı məsləhətçisi Rəşad Əliyev və nazirliyin mətbuat katibi Zöhrə Əliyeva və KİV nümayəndələri iştirak edirdilər.

İnfoturun ilk günü media nümayəndələri Gədəbəy Rayon Mədəniyyət Evində “Əfsanələr Paytaxtı” ilinin yekun tədbirində iştirak etdilər. Tədbiri Mədəniyyət və Turizm Şöbəsinin müdiri Fazilə Məmmədova açaraq, Gədəbəy rayonunun “Əfsanələr Paytaxtı” seçilməsinin rayonun mədəni həyatında sözün əsl mənasında əhəmiyyətli bir dəyişikliyə səbəb olduğunu, bir il ərzində Gədəbəydə çoxsaylı tədbirlərin təşkil edildiyini, rayona gələn turistlərə bölgənin tarixi, mədəniyyəti və turizm potensialı haqqında məlumat verildiyini vurğuladı. Zəngin tarixə malik Gədəbəyin hər qarışında bir abidəyə rastlandığını diqqətə çatdıran Fazilə Məmmədova rayonun, həm təbiət, həm də abidələrinin özlüyündə bir əfsanə olduğunu dedi: “Mədəniyyət və Turizm Nazirliyinin “2010-2014-cü illər üçün Xalq Yaradıcılığı Paytaxtları” proqramına rayonumuza məhz “Əfsanələr Paytaxtı” nominasiyasının verilməsi biz gədəbəyliləri olduqca məmnun etdi. Keçirdiyimiz çoxsaylı tədbirlərə əsasən deyə bilərəm ki, bu il Gədəbəy tarix, ədəniyyət və turizm potensialının tanıdılması baxımından çox əhəmiyyətli il oldu. Buna görə də biz gədəbəylilər rayonumuza göstərilən bu diqqətə görə mədəniyyət və turizm naziri Əbülfəs Qarayev başda olmaqla, nazirliyin bütün əməkdaşlarına, jurnalistlərə öz minnətdarlığımızı bildiririk”.

Rayon İcra Hakimiyyəti başçısının müavini Qüdrət Paşayev Gədəbəyin, həm sənaye və kənd təsərrüfatı, həm də turizm sahəsində ölkənin mühüm regionlarından biri olduğunu bildirdi: “Gədəbəy Azərbaycanın ən qədim insan yaşayış məskənlərindən biridir. Rayon ərazisində 106-dan çox tarixi abidə var. Onların əksəriyyəti qorunan abidələr siyahısındadır, bu sırada dünya əhəmiyyətli abidələr də var. XIX əsrin ortalarında Gədəbəy rayonu ərazisində mis filizi yataqları kəşf edilib, 1855-1856- cı illərdə yerli sahibkarlar tərəfindən misəritmə zavodu tikilib istifadəyə verilib. Daha sonra həmin zavod Almaniyanın “Siemens” şirkəti tərəfindən alınaraq, 1865-ci ildə yenidən qurulub. Rayounmuz həmçinin mineral suları ilə də məhşurdur. Bütün bunlar Gədəbəy torpaqlarımım təbii sərvətlərlə zənginliyindən xəbər verir”. Son illər Gədəbəydə böyük quruculuq işlərinin görüldüyünü qeyd edən Q.Paşayev turizmin inkişafı üçün rayonda əlverişli infrastruktur yaradıldığını, yolların bərpasına xüsusi diqqət göstərildiyini, bundan başqa 10 il ərzində rayonda 70 orta məktəb binası, bir neçə xəstəxananın tikilib istifadə verildiyini, Slavyanka, Saratovka və başqa kəndlərdəki məktəb binalarının təmiri və yeni məktəb binalarının inşasının həyata keçirlidiyini, rayon mərkəzində yeni bazar tikildiyini KİV nümayəndələrinin diqqətinə çatdırdı. Qeyd edək ki, hazırda Gədəbəydə 109 kitabxana və rayon mərkəzində böyük musiqi məktəbi fəaliyyət göstərir.

Mədəniyyət və Turizm Nazirliyi Mədəniyyət siyasəti şöbəsinin müdiri Fikrət Babayev “2010-2014- cü illər üçün Xalq Yaradıcılığı Paytaxtları” proqramının üçüncü ilinə yekun vurulduğunu və bu layihənin paytaxtın və turistlərin diqqətini bölgələrə cəlb etməsi baxımından əhəmiyyətli olduğunu önə çəkdi: “2010-cu ildə Qazax, Gəncə, Şəki, 2011-ci ildə Lənkəran, İsmayıllı, Şabran bu layihədə iştirak edib. Bu il isə Quba, Masallı və Gədəbəy sənətkarlıq, əfsanələr və folklor paytaxtları elan olunub. Gədəbəy bu sırada xüsusi yer tutur. Paytaxtdan uzaqda yerləşməsinə başxmayaraq, Gədəbəy respublikamızın ən prespektivli rayonlarından biridir. Son illər burda baş verən müsbət dəyişikliklər, aparılan tikinti və quruculuq işləri onu deməyə əsas verir ki, Gədəbəydə güclü turizm infrastrukturu yaradılıb. Gədəbəy “Əfsanələr Paytaxtı” kimi bu il çox fəallıq nümayiş etdirib, rayonda bir sıra önəmli tədbirlər keçirilib. Ümid edirəm ki, Gədəbəy gələcəkdə də nazirliyin layihələrində yaxından iştirak edəcək”.

Çıxışlardan sonra tədbir rayon Mədəniyyət Evinin hazırladığı konsert proqramı ilə davam etdirildi. Aşıq Sayad Pənahovun rəhbərliyi ilə Aşıqlar Ansamblının və gənc aşıq Pərvizin ifası xüsusilə zövq oxşadı. Konsert proqramının ardınca Mədəniyyət Evinin foyesində açılmış Gədəbəy rayonunun tarixi abidələrini, təbii mənzərələrini, ümumilikdə mədəniyyətini əks etdirən fotosərgiyə baxış keçirildi. Fotolarda əks olunmuş yaşı yüz illəri ötümüş tarixi abidələr bu diyarın çox qədim və əfsanəvi diyar olduğunu bir daha təsdiq edirdi. Mədəniyyət Evinin nəzdnində yaradılan “Miskin Abdal” ədəbi məclisi, “Bələdçi turizm klubu”, “Siemens Muzeyi” , “Örnək bilgi mərkəzi” ilə də tanışlıq oldu. Gədəbəydə yeni inşa olunan Aşıq Musiqisi Kollecinin müasir üslubda tikilmiş,160 nəfər şagird üçün nəzərdə tutulan binasında, demək olar ki, tamamlanma işləri görülür və buranın yaxın günlərdə istifadəyə veriləcəyi bildirildi.

Səfərin ikinci günü əfsanələşmiş abidələrlə tanışlıq gerçəkləşdi. Rayon ərazisində tunc dövrünün sonuna aid siklopik tikililər, Böyükqala qalası, Qalakənd qalası (XVI əsr), Qız qalası(IX əsr), XIX əsrdə tikilmiş tağlı körpü, son tunc-ilk dəmir dövrünə aid olan Qarabağ qalası, Pir qalası, Koroğlu qalası, Parakənd qalası var. Düzyurd kəndi ərazisində yerləşən “Siemens” körpüsü xüsusilə maraqlı abidələrdəndi. XIX əsrdə inşa edilən körpü iki dağı birləşdirir və bu körpüdən Siemens qardaşları xammal və yanacaq daşımaq üçün istifadə ediblər. Səfər çərçivəsində qonaqlar ümummilli lider Heydər Əliyevin Gədəbəydə təşkil edilən anım tədbirinə də qatıldılar. Mərasimdən sonra rayon İcra Hakimiyyətinin başçısı Ramiz Yediyarovun rəhbərliyilə təşkil edilən, ulu öndərin vəfatının 9-cu ildönümü ilə bağlı toplantı keçirildi.

Günel MUSA

Bölmənin digər xəbərləri