|
|
|
|
Joao Suareşin ATƏT PA-nın xüsusi nümayəndəsi kimi regiona ilk səfərini edəcək
ATƏT Parlament Assambleyasının (PA) Cənubi Qafqaz və Dağlıq Qarabağ üzrə xüsusi nümayəndəsi Joao Suareş bu il fevralın 18-19-da regiona səfər edəcək.
Bu barədə APA-ya açıqlamasında Milli Məclis sədrinin müavini, Azərbaycanın ATƏT PA-da nümayəndə heyətinin rəhbəri Bahar Muradova bildirib.
B. Muradovanın sözlərinə görə, xüsusi nümayəndənin səfəri bir neçə dəfə təxirə düşüb: “Səfər sonuncu dəfə bu il yanvarın 18-19-na nəzərdə tutulsa da, yenə təxirə salındı. Suareşin səfəri bundan əvvəl də bir neçə dəfə təxirə düşüb. Səfərlərin təxirə düşməsi sırf texniki səbəblərlə bağlı olub. Lakin səfər ATƏT PA-nın fevralın 21-22-də keçiriləcək qış sessiyası qabağı baş tutacaq. O, hər üç Cənubi Qafqaz ölkəsində olacaq. Regiona səfərinə Azərbaycandan başlayacaq xüsusi nümayəndənin Azərbaycan prezidenti, Milli Məclis sədri, xarici işlər naziri və digər rəsmilərlə görüşü olacaq”.
B. Muradovanın sözlərinə görə, J. Suareş hər üç ölkədə vəziyyətlə tanış olub, ATƏT PA-nın daimi komitələrinin iclaslarında məlumat verəcək: “Biz çalışacağıq ki, onun “Dağlıq Qarabağın azərbaycanlı icması” İctimai Birliyi ilə də görüşünü təşkil edək. Əminəm ki, etiraz etməyəcək. Çünki o, ATƏT PA-nın prezidenti olduğu dövrdə də Dağlıq Qarabağ məsələsini daim diqqətdə saxlayıb. Məhz onun səyləri nəticəsində münaqişə ilə bağlı ATƏT PA-nın 2011-ci ilin oktyabrında Xorvatiyada keçirilən sessiyasında müzakirələr aparıldı. Həmin vaxt onun Azərbaycan tərəfinin təşəbbüsünü dəstəkləməsi nəticəsində bu müzakirələr mümkün oldu”.
Qeyd edək ki, J. Suareş 2011-ci il iyulun 10-da ATƏT PA-nın Belqradda keçirilən sessiyasında qurumun Cənubi Qafqaz və Dağlıq Qarabağ üzrə xüsusi nümayəndəsi təyin olunub. O, bu posta hələlik regiona səfər etməyib.
J. Suareş ATƏT PA-nın prezidenti də olub
