Bakı şəhər Mədəniyyət və Turizm Baş İdarəsinin nəzdində fəaliyyət göstərən Bakı Uşaq Teatrı həftənin şənbə və bazar günləri axşam saatlarında şəhərimizin sakinləri və paytaxtımızın qonaqlarının asudə vaxtlarının səmərəli və maraqlı təşkili məqsədilə yeni layihəyə start verib.
Mədəniyyət və Turizm Nazirliyindən 525.az-a verilən məlumata görə, mayın 28-də rejissor İntiqam Soltanın quruluşunda “Ağıllı Tülkü” tamaşası, 29 may tarixində isə Arzu Soltanın əsəri əsasında İntiqam Soltanın quruluşunda “Fidan və Qoğal” tamaşası nümayiş olunub.
04-05 iyun tarixində tamaşaçılara Tofiq İsgəndərlinin iştirakı ilə “İlluziya şou”su, İntiqam Soltanın və Niyaz Qasımovun aparıcılığı ilə əyləncəli oyunlar və teatrın bədii rəhbəri İntiqam Soltanın quruluşunda “Göyçək Fatma” və Abdulla Şaiqin eyniadlı əsəri əsasında İlhamə Əhmədovanın quruluşunda “Danışan Gəlincik” tamaşası nümayiş etdirilib.
11-12 iyun tarixində İntiqam Soltanın quruluşunda “Şrek və Dostları” və Könül Şahbazovanın quruluşunda isə Elçinin əsəri əsasında “Humayın yuxusu” tamaşaları nümayiş olunub.
18-19 iyun tarixində müəllifi Arzu Soltan, rejissoru İntiqam Soltan olan “Meymun ili” və monqol xalq nağılı əsasında hazırlanmış “Dələduz siçanlar” tamaşaları nümayiş olunub.
Yay aylarında açıq havada hər həftə sonu, şənbə və bazar günləri 19:00-dan 21:00-dək Səbail rayonunda yerləşən Xaqani bağında (Malakan bağı) teatrın repertuarında olan maraqlı tamaşalar nümayiş etdiriləcək, balacalar üçün müxtəlif əyləncəli oyunlar və şoular təşkil olunacaq.
Cavid QƏDİR