"Qarabağ" rekordunu yenilədi (Fotolar, Video)
Ötən gün Avropa Liqasının üçüncü təsnifat mərhələsində İsveçin “Gefle” klubunu 1:0 hesabı ilə məğlub edən “Qarabağ” özünəməxsus uğurlu rekordunu yeniləyib.
Qol.Az-ın məlumatına görə, Ağdam təmsilçisi avrokuboklarda dalbadal altı oyunda uduzmayan yeganə Azərbaycan klubu kimi tarixə düşüb.
Qurban Qurbanovun baş məşqçisi olduğu komandanın uğurlu seriyası ötən gün “Gefle” ilə oyunun baş tutduğu Tofiq Bəhramov adına Respublika stadionunda başlayıb. 2011/12 mövsümündə Ağdam klubu Belçikida 1:3 hesabı ilə uduzduğu “Brügge”yə Bakıdakı təkrar oyunda qalib gəlib – 1:0. İki oyunun nəticəsinə əsasən, mübarizəni dayandıran “Qarabağ” 2012/13 mövsümündə avrokuboklara vəsiqə əldə edə bilməyib.
Bu mövsüm isə komanda qitəmiqyaslı yarışda uğurlu çıxışı ilə diqqət cəlb edir. İlkin təsnifat mərhələsində Makedoniya “Metallurq”una hər iki oyunda eyni hesabla (1:0) qalib gələn “Qarabağ” ikinci mərhələdə Bakıda ilk matçda Polşa “Piast”ını 2:1 hesabı ilə məğlub edib. Bununla da “Qarabağ” Azərbaycan futbolunda tarixi nəticəyə imza atıb: Avrokuboklarda dalbadal dörd oyunda dörd qələbə. Polşa təmsilçisi ilə cavab matçında “Qarabağ”ın qələbə seriyası qırılsa da, səfər qarşılaşmasındakı 2:2 hesablı nəticə Ağdam komandasının qitə miqyaslı UEFA turnirlərində məğlubiyyətsiz oyunların sayını 5-ə çatdırıb.
Ötən gün isə Qurban Qurbanovun komandası "Gefle"yə 1:0 hesabı ilə qalib gəlməklə məğlubiyyətsiz oyunlar seriyasını 6-ya çatdırıb. Ağdam təmsilçisi avqustun 8-də İsveçdə keçiriləcək cavab qarşılaşmasında ən azı rəqibinə məğlub olmamaqla bu seriyanı daha da uzada bilər.
